पणजी : देशातील सर्वोच्च पद असलेल्या राष्ट्रपतिपदासाठी आज निवडणूक होत आहे. सत्ताधारी ‘एनडीए’च्या उमेदवार द्रौपदी मुर्मू आणि विरोधकांचे संयुक्त उमेदवार यशवंत सिन्हा यांच्यात थेट लढत आहे. निवडणुकीसाठी पर्वरी विधानसभा संकुलाच्या तळ मजल्यावर विशेष मतदान कक्ष उभारण्यात आला आहे. राज्यातील आमदार, खासदार येथे आपला मतदानाचा हक्क बजावत आहेत. यासाठी कडक सुरक्षा बंदोबस्त ठेवण्यात आला आहे.
निवडणुकीत संसदेच्या दोन्ही सभागृहांमधील 776 खासदार, देशातील सर्व विधानसभांचे 4033 आमदार असे एकूण 4809 मतदार मतदान करतील.
दोन्हीही गटांकडून मोर्चेबांधणी
क्रॉस मतदान होऊ नये सत्ताधारी भाजप आणि विरोधकांकडून सतर्कता बाळगण्यात येत आहे. काँग्रेसने आपले आमदार फुटू नयेत यासाठी पाच आमदारांना चेन्नईला हलवले होते. काँग्रेसचे इतर सहा आमदार राज्यातच असून त्यांची मते यूपीएला मिळणार नाहीत असे पक्षाने गृहीत धरले आहे. भाजपचे 20, मगो पक्षाचे 2 आणि 3 अपक्ष आमदार सकाळी हे विधानभवनात जाऊन मतदान केल्यावर विधानसभेच्या कामकाजात भाग घेतील.
राज्यातील 40 आमदार करणार मतदान
पर्वरी विधानसभा संकुलात तळमजल्यावर लोकलेखा समिती (पीएसी) कक्षेजवळील रूम नंबर 15 मध्ये विशेष मतदार कक्ष उभारण्यात आला आहे. यासाठी पोलिस, विधानसभा सुरक्षा यंत्रणा व राखीव पोलीस दलाची सुरक्षा आहे. या ठिकाणी निवडणुकीत राज्यातील 40 आमदार सहभाग घेत आहेत. राज्यातील 2 लोकसभा खासदार आणि 1 राज्यसभा खासदार हे दिल्लीत संसद भवनामध्ये मतदान करण्याची शक्यता आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
