CM Pramod Sawant: '.. अशी नोकरी मिळत नाही'! तक्रारदारांचे पैसे मिळवून देऊ अशी मुख्यमंत्र्यांची ग्वाही

CM Pramod Sawant About Cash For Job Scam

पणजी: कॅश फॉर जॉब प्रकरणात पैसे घेणारे कुठल्याही पक्षाचे असले तरी त्यांच्यावर कारवाई होणारच, असे मुख्यमंत्री डॉ. प्रमोद सावंत यांनी निक्षून सांगितले. पैसे घेऊन फसवणूक केली असल्यास तक्रार करावी, आम्ही आरोपींवर कठोर कारवाई करू. सोबत दोषींची मालमत्ता जप्त करून तक्रारदाराला त्यांचे पैसेही मिळवून देऊ, अशी ग्वाही मुख्यमंत्र्यांनी दिली.

या प्रकरणात कोणालाही सोडले जाणार नाही. दोषींविरुद्ध कठोर कारवाई करून त्यांची मालमत्ता जप्त करून तक्रारदारांना त्यांचे पैसे परत मिळवून देण्याचा प्रयत्न केला जाईल.

पैसे देऊन नोकरी मिळत नाही!

मुख्यमंत्री सावंत यांनी सांगितले की, या प्रकरणात आतापर्यंत १८ जणांना अटक करण्यात आली आहे आणि या प्रकरणात सापडलेल्या सरकारी कर्मचाऱ्यांनाही निलंबित करण्यात येईल. मुख्यमंत्र्यांनी नागरिकांना अशा प्रकारच्या फसवणुकीपासून सावध राहण्याचे आवाहन केले आणि गोव्यात सरकारी नोकरी पैसे देऊन मिळत नाही, हे देखील स्पष्ट केले.