झुआरीनगरचे नागरिक पाणी बिलावरून संतप्त

झुआरीनगर येथील प्रभाग नऊमधील काही रहिवाशांना पाणी बिले मोठ्या रकमेची आल्याने त्यांनी संताप व्यक्त केला आहे. 'रोजंदारीवर काम करणारे आम्ही, एवढी मोठ्या रकमेच्या बिलांसाठी पैसे कोठून आणणार, असा सवाल त्या रहिवाशांनी उपस्थित केला आहे. या प्रकरणी पाणी पुरवठा विभागाच्या अधिकारी (Officer) वर्गाची भेट घेऊन हा प्रश्न उपस्थित करण्याचा मनोदय झुआरीनगरच्या रहिवाशांनी व्यक्त केला आहे.

या भागात अनियमित पाणी पुरवठा होतो, या कारणासाठी गेल्या महिन्यामध्ये या वस्तीतील तसेच आसपासचे रहिवाशी रस्त्यावर उतरले होते. त्यावेळी पाणी (water) पुरवठा विभागाच्या अधिकाऱ्यांनी पाणी पुरवठ्यात सुधारणा करण्याचे आश्वासन दिले होते.

पाणी पुरवठा योग्यरीत्या झाला नसतानाही रहिवाशांना हजारो रुपयांची पाणी बिले आली आहेत. गेल्या सहा महिन्यांची बिले एकदम देण्यात आली आहेत. काहीजणांना दहा हजार रुपयांपर्यंत पाणी बिले आली आहेत.

या भागातील काही रहिवाशांच्याघरांमध्ये तीन माणसे राहत असतानाही त्यांना हजारो रुपयांची बिलं आल्याबद्दल त्यांनी संताप व्यक्त केला आहे. पूर्वी अतिशय कमी पाणी बिल येत होते. एवढ्या मोठ्या रकमेची बिले कधीच आली नसल्याचे रहिवाशी सांगत आहेत.

नागरिकांची अधिकाऱ्यांनी स्पष्टीकरण देण्याची मागणी

सरकारने सोळा हजार लिटरपर्यंत पाणी बिल माफ केले असल्याची घोषणा केली होती. त्यामुळे गेल्या सहा महिन्यांमध्ये बिल न आल्याने आम्हाला वाटले की, आम्हाला मोफत पाणी मिळत आहे. परंतु, आमच्या भ्रमाचा भोपळा फुटला असल्याचे रहिवाशांनी सांगितले. आम्ही रोजंदारीवर जगणारी माणसे आहोत, त्यामुळे एवढी मोठी रक्कम भरण्यासाठी आम्हाला कर्ज घ्यावे लागणार असल्याचे काहीजणांनी सांगितले.

या बिलांसंबंधी पाणी पुरवठा विभागाच्या अधिकारी वर्गाने स्पष्टीकरण देण्याची गरज असल्याचे त्यांनी सांगितले. रहिवाशांनी आपली कैफियत स्थानिक पंच सदस्य गणेश लमाणी व आरिफ कादर यांच्या कानावर घातली आहे.