'गोवा राज्याच्या सीमा त्वरित सील करा'

मडगाव : गोव्यात कोव्हिडचे रुग्ण वाढू लागल्याच्या पार्श्वभूमीवर सरकारने राज्याच्या सीमा त्वरित सील कराव्या, अशी मागणी तृणमुलचे नेते चर्चिल आलेमाव (Churchill Alemao) यांनी आज केली. कालच्या एकाच दिवशी कोविडचे 112 नवीन रुग्ण आढळून आले. प्रत्यक्षात ही संख्या 400 ते 500 रुग्णांच्या घरात असण्याची शक्यता आहे, असेही ते म्हणाले.

आम्ही यावेळी देवाच्या दयेने ख्रिसमस (Christmas) चांगल्या रीतीने साजरा केला. जर नवीन वर्षही चांगल्या रीतीने साजरे करायचे असल्यास गोव्यात येणाऱ्या पर्यटकांवर निर्बंध घातलेच पाहिजेत, अन्यथा परिस्थिती हाताबाहेर जाईल, अशी भीती आलेमाव यांनी व्यक्त केली.

गोव्यात येणाऱ्या प्रत्येक माणसाची कसून तपासणी व्हायला पाहिजे. रेल्वे स्थानके आणि विमानतळावर (Airport) तपासणी यंत्रणा उभी करण्याची गरज आलेमाव यांनी व्यक्त केली.

सध्या उत्तर गोव्यात सुरु असलेला सनबर्न संगीत महोत्सव (Sunburn Festival) ताबडतोब बंद करावा, अशी मागणीही त्यांनी केली. गोव्यात स्थिती धोकादायक होऊ पाहत असताना असले महोत्सव का असा सवाल करुन कोणत्या मंत्र्याला हा महोत्सव पाहिजे असा थेट सवालही त्यांनी केला.