Christmas in Goa: बिग फूटमध्ये साकारलीये अनोखी कारागिरी; गोव्यात आहात मग लोटलीला जाऊन आलात का?

Big Foot Museum Lotli Christmas Decoration

पणजी: ख्रिसमसचा सण म्हटलं की साहजिकपणे आपल्या डोळ्यांसमोर गोवा हे नाव उभं राहतं. दरवर्षीप्रमाणे यंदा देखील गोव्यात ख्रिसमसची बरीच धूम आहे. जागोजागी रोषणाई, झगमगाट आणि सजावट पाहायला मिळतेय. तुम्ही जर का ख्रिसमसच्या निमिताने गोव्याला आला असाल तर इथे एक तुम्हाला आवडण्यासारखी जागा आहे आणि यंदाच्या वर्षी या खास जागेत ख्रिसमसचं उत्तम डेकोरेशन देखील केलंय. कुठे माहितीये का? लोटलीमधल्या बिग फूटमध्ये.

सध्या लोटली येथील बिग फूट या संग्रहालयात नाताळ सणानिमित्त महेंद्र अल्वारीस यांनी परंपरेला छेद देत तयार केलेला गोठा रसिकांचे लक्ष वेधून घेत आहे.टाकाऊतून मौल्यवान कारागिरीची निर्मिती सुंदरतेने केल्याचे या ठिकाणी पहायला मिळते, असे प्रसिध्दीपत्रकात म्हटले आहे. ही कलाकृती आगळा संदेशही देणारी आहे.

प्रेम, शांती आणि माया हे या मोसमातील मूल्यांचे संकलित सार या कलाकृतीतून रेखांकीत होते. या कलाकृतीच्या निर्मितीसाठी कलाकाराने जुने पुठ्ठ्यांचे बॉक्स, शिल्लक आवरणे, साधे गोंद यांचा वापर केला आहे. संवर्धनासाठी संरक्षण आणि आपल्या मुलांना राहण्यायोग्य असा ग्रह संवर्धित करण्याची सुनिश्‍चिती, असा संदेश या कलाकृतीतून देण्यात आला आहे.

शिवाय इथे ख्रिसमसच्या निमित्ताने सांता क्लॉस सुद्धा तयार करण्यात आला आहे. सायकल सोबत उभा असलेला हा भलामोठा सांता अनेकांचं लक्ष वेधून घेतोय. तुमच्यासोबत जर का लहान मुलं असतील तर त्यांना हा सांता दाखवायला नक्की घेऊन जाऊ शकता. ख्रिसमसच्या निमिताने महेंद्र अल्वारीस यांनी उभारलेल्या या देखाव्याला पाहण्यासाठी गोव्यातील अनेक शाळकरी मुलांनी सुद्धा भेट दिली आहे. महेंद्र अल्वारीस यांनी बिग फूटमध्ये ट्री ऑफ विष पण चित्रित केली आहे, जिथे तुम्ही तुमची इच्छा नक्कीच लिहू शकता. महेंद्र अल्वारीस एक कलाकार आहेत आणि ख्रिसमस निमित्त त्यांनी साकारलेली कलाकारी अनेकांचं लक्ष वेधून घेतेय.