Goa Christmas 2024: डिचोलीत नाताळाची लगबग! ‘ख्रिसमस’ साहित्याने फुलली बाजारपेठ

डिचोली: ‘नाताळ’ म्हणजे ख्रिस्ती बांधवांचा उत्साह द्विगुणित करणारा सण. हा सण जवळ आल्याने डिचोलीत नाताळ सणाची लगबग सुरू झाली असून या सणाची तयारी सुरू असल्याचे दिसून येत आहे.

बाजारातील काही दुकानेही ‘ख्रिसमस’ साहित्याने फुलली असून ख्रिस्ती बांधव नाताळ सणाच्या तयारीला लागले आहेत. डिचोली (Bicholim) शहरात ख्रिस्ती बांधवांची लोकसंख्या कमी असली, तरी ख्रिस्ती बांधव नाताळ सण परंपरेप्रमाणे मोठ्या धुमधडाक्यात साजरा करतात.

शहरातील काही दुकाने ख्रिसमस साहित्याने सजली आहेत. या दुकानातून ख्रिसमस ट्री, स्नोबॉल, सांताक्लॉजचे मुखवटे, टोप्या, तयार गोठे आणि वेगवेगळ्या आकारांची रंगीबेरंगी नक्षत्रे आदी सजावटीसाठी लागणारे साहित्य विक्रीस उपलब्ध झाले असून त्याची खरेदीही सुरू झाली आहे. ‘नाताळ’साठी लागणाऱ्या करंज्या आदी खाद्यपदार्थ बनविण्याचीही लगबग सुरू आहे.

देखाव्यांची तयारी

‘ख्रिसमस’निमित्त डिचोली शहरासह आसपासच्या परिसरातील घरांसह कपेल, क्रॉस (खुरीस) यांची रंगरंगोटी सुरू झाली आहे. ख्रिस्ती बांधवांनी सध्या गोठा आदी सजावटीच्या कामाकडे लक्ष केंद्रित केले आहे. नाताळाच्या पूर्वरात्री शहरातील अवरलेडी ऑफ ग्रेस सायबिणीच्या चर्चमध्ये प्रार्थनासभा आदी कार्यक्रम होणार आहेत. येशू ख्रिस्ताच्या जन्मावर आधारीत भव्य देखावे उभारण्याचे काम सुरू झाले आहे. पुढील आठवड्यात शहरात ख्रिसमसचा (Christmas) उत्साही माहोल तयार होणार आहे.