पुढचं सरकार जबाबदारीने निवडा, मुख्यमंत्र्यांचं गोमंतकीयांना आवाहन

फोंडा: राज्याच्या विकासासाठी सत्ताधारी भाजप सरकार सातत्याने प्रयत्न करत आहे. त्याला गोमंतकीय जनता नक्कीच साथ देईल असा विश्वास मुख्यमंत्री डॉ. प्रमोद सावंत यांनी व्यक्त केला. फोंड्यात आयोजित राज्य सहकार पुरस्कार सोहळ्यात मुख्यमंत्री बोलत होते. यावेळी मुख्यमंत्र्यांनी सरकारने गेल्या वर्षात केलेल्या कामगिरीचा आलेख उपस्थितांसमोर मांडला.

भाजप (BJP) सरकार हे संवेदनशील सरकार असून प्रत्येकाची दखल या सरकारने घेतलेली आहे. त्यामुळे पुढील सरकार निवडताना ते काळजीपूर्वक आणि जबाबदारीने निवडा असं आवाहनही मुख्यमंत्र्यांनी गोमंतकीय जनतेला केलं आहे. तसंच समृद्धी आणणारं भाजपचं सरकार राज्यात सत्तेत येईल आणि गोव्याची जनताच ते आणेल असा विश्वासही त्यांनी व्यक्त केला.

राज्य सरकारतर्फे दिल्या जाणाऱ्या सहकार पुरस्कार वितरण कार्यक्रमावेळी फोंड्यात मुख्यमंत्र्यांनी (Chief Minister) पंतप्रधानांचंही कौतुक केलं. जगभरात पंतप्रधान नरेंद्र मोदींची (Narendra Modi) विश्वनेता अशी ओळख आहे. त्यांच्या मार्गदर्शनाखाली राज्यात विकासाची घोडदौड सुरुच राहणार असंही मुख्यमंत्री पुढे म्हणाले. सहकार पुरस्काराने गौरव झालेल्यांचंही मुख्यमंत्र्यांनी तोंडभरुन कौतुक केलं.

कोणावरही घसरायचं नाही, त्यामुळे मोजकंच बोलतो असं म्हणत राज्याच्या विकासासाठी आणखी प्रयत्न करणार असल्याचं मुख्यमंत्र्यांनी स्पष्ट केलं. गोमंतकीय जनतेची आपल्याला कायम साथ मिळाली आहे, यापुढेही ती मिळेल असा विश्वासही मुख्यमंत्री डॉ. प्रमोद सावंत (Pramod Sawant) यांनी व्यक्त केला.