Chimbel Unity Mall: प्रमाणपत्रे, परवान्यानंतरच ‘चिंबल युनिटी मॉल’चे काम सुरू! पर्यटन खात्याचे स्पष्टीकरण; विकासाला चालना मिळण्याचा दावा

पणजी: चिंबल येथील युनिटी मॉल प्रकल्पाला स्थानिकांचा विरोध असतानाच पर्यटन खात्याने तो प्रकल्प पुढे रेटण्याचा निर्णय घेतला आहे. प्रस्तावित प्रधानमंत्री एकता मॉल (युनिटी मॉल) प्रकल्पाचे बांधकाम सर्व संबंधित विभागांकडून आवश्यक ना-हरकत प्रमाणपत्रे (एनओसी) तसेच चिंबल ग्रामपंचायतीकडून बांधकाम परवाना मिळाल्यानंतरच अधिकृतपणे सुरू केले आहे, असे पर्यटन खात्याने स्पष्ट केले आहे.

हा प्रकल्प सर्व कायदेशीर नियमांचे पालन करणारा असून तो ‘बफर झोन’च्या बाहेर आहे. महत्त्वाचे म्हणजे, जिल्हा न्यायालयाने या बांधकाम परवान्याची नोंद घेतली असून प्रकल्पावर कोणताही स्थगिती आदेश नाही.

त्यामुळे ‘युनिटी मॉल’चे काम पुढे सुरू ठेवता येत आहे. या प्रकल्पामुळे चिंबल आणि आजूबाजूच्या परिसरातील नागरिकांसाठी रोजगाराच्या संधी निर्माण होणार आहेत. यामुळे स्थानिक लोकांचे जीवनमान सुधारेल, आर्थिक स्वावलंबन वाढेल आणि सामाजिक-आर्थिक विकासाला चालना मिळेल असे खात्याचे म्हणणे आहे.

रोजगाराबरोबरच हा प्रकल्प कौशल्य विकास आणि उद्योजकतेवरही भर देतो. केंद्र सरकारच्या “वन डिस्ट्रीक्ट, वन प्रॉडक्ट” या उपक्रमाचा हा भाग असून कारागीर आणि उद्योजकांना त्यांच्या उत्पादनांचे प्रदर्शन व विक्रीसाठी एक व्यासपीठ मिळणार आहे. यामुळे पर्यटन उपक्रमांना चालना मिळेल आणि स्थानिक प्रतिभेला आधुनिक अर्थव्यवस्थेशी जोडण्यास मदत होईल, असे खात्याचे म्हणणे आहे.