मुख्यमंत्र्यांनी केले गोमातेचे पूजन! राज्यातील दूध उत्पादन वाढवण्यासाठी प्रयत्न करण्याचे आवाहन

मुख्यमंत्री डॉ. प्रमोद सावंत यांनी बलिप्रतिपदानिमित्त कुडणे येथील गोमांचल डेअरी फार्मला भेट देऊन गोमातेची पूजा केली. दरवर्षी मुख्यमंत्री पाडव्यानिमित्त गोशाळेला भेट देऊन गोमातेची पूजा करतात. यावर्षीही त्यांनी गोमांचल डेअरी फार्मला खास भेट दिली.

यावेळी मुख्यमंत्री म्हणाले की, गोव्यात दरदिवशी चाडेचार लाख लीटर दूध लागते. पण गोव्याला तील लाख लीटर दूध बाहेरून घ्यावे लागते. यासाठी गोसंवर्धन व दूध उत्पादन वाढवणे आवश्यक आहे. देशी गायींबरोबरच इतरही जातीच्या गायींचे संवर्धन करणे गरजेचे आहे. गोव्यात भटक्या गुरांचा मोठा प्रश्न आहे. त्यांना सध्या विविध गोशाळांमध्ये दाखल करण्यात येत आहे.

त्यामुळे ही समस्या संपून या गुरांपासून बनविण्यात येणाऱ्या गोमय उत्पादनांचा लोकांना व गोशाळांना फायदा होणार आहे. गोमूत्र व शेण यापासून उत्पादने बनविण्यासाठी सरकारकडून लवकरच प्रशिक्षण वर्ग सुरू करण्यात येणार असल्याचे मुख्यमंत्र्यांनी सांगितले.

यावेळी त्यांच्यासोबत वल्लभ साळकर, सुभाष मळीक, संतोष मळीक, शिवानंद बाकरे व इतरांची उपस्थिती होती. मुख्यमंत्र्यांच्या हस्ते गोमांचल डेअरीत दूध पुरवठा करणाऱ्या दूध उत्पादकांचा गौरव करण्यात आला.