Goa Weather Update: राज्यात तुरळक पावसाची शक्यता; तापमानाचा पारा 33 अंशांवर

Goa Weather Update:

राज्यात मागील दोन आठवड्यापासून कडक उन्हाचे चटके बसू लागले आहेत. गुरूवारपासून वाढलेल्या उष्म्‍यातून लोक घामाघून होत असून उष्म्याने अंगाची लाही-लाही होत आहे. आज राज्यातील तापमानाचा कमाल पारा 33.6 अंश सेल्सिअस इतका वाढला आहे.

राज्यातील आर्द्रतादेखील सर्वसामान्य प्रमाणापेक्षा 5 टक्क्यांनी वाढल्याने उष्म्याच्या झळांनी लोक त्रस्त झाले आहेत. राज्यात 29 मे रोजी तुरळक पावसाची शक्यता गोवा वेधशाळेद्वारे वर्तविण्यात आली आहे मात्र पुढील पाच दिवस राज्यातील कमाल व किमान तापमानात मोठे बदल घडणार नाहीत.

त्यामुळे वाढलेला उष्मा कायम राहण्याची शक्यता आहे. पुढील पाच दिवस राज्यातील हवामान कोरडे राहील. गुरूवारी राज्यातील कमाल तापमान 33.6 अंश सेल्सिअस, तर किमान 25.7 अंश सेल्सिअस नोंदवण्यात आले.