डिचोलीत उद्या शिगमोत्सवाची धूम

डिचोली: डिचोलीत येत्या मंगळवार दि. 29 मार्च रोजी शिगमोत्सव साजरा होणार आहे. त्यानिमित्त चित्ररथ, रोमटामेळ, लोककला स्पर्धेसह वेषभूषा स्पर्धा आयोजित करण्यात आली आहे, अशी माहिती डिचोली शिगमोत्सव आयोजन समितीचे अध्यक्ष तथा आमदार डॉ. चंद्रकांत शेट्ये यांनी येथे घेतलेल्या पत्रकार परिषदेत दिली.

सांस्कृतिक वारशाचे जतन व्हावे आणि लोकांच्या मागणीचा विचार करून शिगमोत्सव साजरा करण्याचा निर्णय घेण्यात आल्याचे डॉ. शेट्ये यांनी सांगून सर्वांच्या सहकार्यातून शिगमोत्सव यशस्वी होणार असल्याचा विश्वास व्यक्त केला.

येथील नगरपालिकेत घेतलेल्या या पत्रकार परिषदेवेळी आयोजन समितीचे सचिव दिलीप धारगळकर, राजन कडकडे, नगरसेवक नीलेश टोपले, नारायण बेतकीकर आदी समितीचे पदाधिकारी आणि सदस्य उपस्थित होते.

चित्ररथ, लोककला, रोमटामेळ आणि वेषभूषा स्पर्धेसाठी आकर्षक रोख बक्षिसे देण्यात येणार आहेत. सायंकाळी 6 वा. बोर्डे वडाकडून मिरवणुकीला प्रारंभ होणार असून, भायलीपेठमार्गे हिराबाई झांट्ये स्मृती सभागृहाजवळ मिरवणुकीची सांगता होणार आहे. खुल्या गटासह 5 ते 9 आणि 10 ते 15 वर्षे वयोगटातील स्थानिक मुलांसाठी वेशभूषा स्पर्धा घेण्यात येणार आहे. अशी माहिती दिलीप धारगळकर यांनी दिली.