आमोणे उपवीज केंद्रावर ‘लाईनमन’ दिन साजरा

साखळी: नावेली - साखळी येथील 220/33/11 केव्ही आमोणे उपवीज केंद्रावर आज ‘लाईनमन’ दिवस साजरा करण्यात आला. यावेळी उप विभाग - 2, थिवी येथील सर्व विद्युत खात्यातील कामगार उपस्थित होते. सर्व कामगारांना स्वसुरक्षा राखून लोकांना प्रामाणिक सेवा देण्याची शपथ देण्यात आली. तद्‍नंतर सर्वांचा गुलाब व स्मतिचिन्ह देहून गौरव करण्यात आला.

असा कार्यक्रम प्रथमच खात्याने आयोजित केल्यामुळे सर्व कामगारांनी खात्याचे आभार मानले. तसेच असा कार्यक्रम आयोजित करण्याने सर्व कामगारांनी एक उत्साह वाढला आहे, असे कर्मचाऱ्यांनी सांगितले. कोरोना काळात वेगवेगळ्या खात्यात कोरोना वॉरियर म्हणून सत्कार करण्यात आला होता, पण विद्युत खात्यातील कामगारांना अशाप्रकारचा सन्मान आता देण्यात आल्यामुळे सर्व कामगार खूष होते.

यावेळी व्यासीठावर कार्यकारी अभियंते रॉबर्ट नोरोन्हा, साहाय्यक अभियंते राजेश नाईक, कनिष्ठ अभियंते विष्णू वझे व प्रितेश गावस उपस्थित होते.

कार्यक्रमाचे प्रास्ताविक भाषण कार्यकारी अभियंत्याने केले व तद्‍नंतर कनिष्ठ अभियंते विष्णू वझे यांचे भाषण झाले. कार्यक्रमाचे सूत्रसंचालन साहाय्यक अभियंते राजेश नाईक यांनी केले, तर कनिष्ठ अभियंते प्रितेश गावस यांनी आभार मानले.