करंझोळ ग्रामस्‍थ: अगोदर जमिनी नावावर करा,नंतर वन्यप्राणी सर्वेक्षण करा

वाळपई: सत्तरी तालुक्यातील करंझोळ व परिसरातील लोकांच्या जमिनी आजही नावावर झालेल्या नाहीत. हे लोक शेकडो वर्षांपासून वास्तव्य करून असून जमीन कसतात. परंतु गोवा मुक्तिनंतर सुरूवातीला वन खाते व नंतर म्हादई अभयारण्य क्षेत्र केल्याने करंझोळ गावावर संक्रात आली. जमीन मालकी मिळावी म्हणून गेल्या काही वर्षांपासून आंदोलन सुरू आहे. म्हणूनच आधी सरकारने लोकांच्या जमिनी नावावर कराव्यात व नंतरच म्हादई वन विभागाने वन्यप्राणी सर्वेक्षण काम करावे अशी जोरदार मागणी करंझोळवासीयांनी आज केली. माळोली येथील म्हादई वन विभागाच्या कार्यालयात वनाधिकारी दीपक तांडेल यांच्यासोबत करंझोळ लोकांची आज बैठक झाली.

यावेळी नागरिक हरिश्चंद्र गावस म्हणाले की, दोन दिवसांपूर्वी करंझोळ गावात म्हादई वनविभागातर्फे वन्यप्राणी सर्वेक्षणाचे काम करण्यासाठी कर्मचारी आले होते. पण आम्ही त्यांना सर्वेक्षणाचे काम करण्यास विरोध दर्शविला. आधी जमीन मालकी विषय सोडवा व नंतरच तुम्ही तुमचे काम करा, अशी भूमिका घेतली. त्यावरुन आज अधिकारी दीपक तांडेल यांच्यासोबत चर्चा केली व त्यांना आमची भूमिका समजावून सांगितली.

मध्यंतरीच्‍या काळात म्हादई अभयारण्य जाहीर करून लोकांना संकटात टाकले व आता म्हादई विभागाने लोकांनाच अतिक्रमित केले आहे. हिंमत असेल तर आमच्यावर जमिनींवर अतिक्रमण करतो अशी प्रकरणे घालावीत असे आव्हान हरिश्चंद्र गावस यांनी म्हादई वनविभागाला दिले. यावेळी बातू गावडे, बाळा नाईक, काशिनाथ गावडे, अर्जुन गावडे आदींची उपस्थिती होती.

अखिल भारतीय व्‍याघ्र सर्वेक्षणानुसार सत्तरीत कोदाळ, चरावणे, करंझोळ या ठिकाणी काम हाती घेतले आहे. करंझोळ येथे काम करण्यासाठी आमचे कर्मचारी गेले होते. त्यावेळी लोकांनी सर्वेक्षणाचे काम करण्यास विरोध केला. त्यानुसार आज करंझोळवासीयांशी चर्चा करून हा विषय वरिष्ठ पातळीवर कळविला जाईल.

- दीपक तांडेल, म्हादईचे वनअधिकारी