St Estevam Accident: अजूनही सांतइस्तेव्ह नदीत शोधकार्य सुरूच; मांडवी येथील अज्ञात मृतदेहावरून चर्चेला उधाण

तिसवाडी: टोलटो-सांतइस्तेव्ह येथील कुंभारजुवे नदीत कार बुडून बशुदेव भंडारी (मूळ गुजरात) हा युवक बेपत्ता होऊन ४४ तास उलटले तरी अजून त्याचा शोध लागलेला नाही. किनारी पोलिसांकडून अजूनही शोधकार्य सुरूच आहे.

दरम्यान, बेपत्ता बशुदेवचे वडील गोव्‍यात पोचले असून आज त्‍यांनी फेरीधक्क्याला भेट देऊन पाहणी केली.

शनिवारी मध्‍यरात्री टोलटो फेरीधक्क्यावरून कार नदीत गेल्याने त्यातील स्वार युवक आणि युवतीने जीव वाचवण्यासाठी नदीत उडी घेतली होती. युवतीने पोहत किनारा गाठला, परंतु बशुदेव हा बेपत्ता झाला आहे.

अन्‌ पसरली अफवा

बेती येथे मांडवी नदीत अज्ञात व्यक्तीचा मृतदेह सापडल्यानंतर सांतइस्तेव्ह येथे बेपत्ता झालेल्या बशुदेव भंडारी याचाच तो मृतदेह असल्याची चर्चा सर्वत्र सुरू झाली. परंतु तो मृतदेह बशुदेव याचाच असल्‍याची पुष्टी झालेली नाही, अशी माहिती जुने गोवे पोलिस निरीक्षक सतीश पडवळकर यांनी दिली.