कस्टम अधिकाऱ्यांकडून विदेशी नागरिकाची लुबाडणूक, कॅप्टन विरियातो फर्नांडिस चिडले, म्हणाले...

सासष्टी: एका विदेशी नागरीकाने विमानतळावर कस्टम अधिकाऱ्यांनी आपली लुबाडणूक केल्याचे आपल्याला सांगितले आहे, असे खासदार कॅप्टन विरियातो फर्नांडिस यांनी मडगावात पत्रकारांना सांगितले. त्याचे सोन्याचे दागिने काढून घेतले व वरुन पैशांची मागणी केली. आपण हे प्रकरण केंद्रीय अर्थ मंत्रालय तसेच महसूल संचालनालयाकडे नेणार असल्याचेही खासदाराने सांगितले.

गोव्यात प्रशासन ढासळले असून सरकारचे कुणावरही नियंत्रण राहिले नाही. एस्कॉर्ट सर्व्हिसेसच्या नावाने गोव्याची बदनामी होत आहे. एस्कॉर्ट सर्व्हिस म्हणजे वेश्या व्यवसाय असा त्याचा अर्थ झाल्याचे सांगून गोवा हे वेश्याव्यवसाय, अंमली पदार्थ, बेरोजगारीचे केंद्र बनल्याचेही फर्नांडिस यांनी सांगितले.

जर सरकारने सध्या गोव्यात जी बेकायदेशीर कृत्ये चालू आहेत, त्याचा छडा लावण्यासाठी पोलिसांना स्वातंत्र्य दिले व पोलिसांनी गैरव्यवहारात गुंतलेल्यांवर कडक कारवाई केली तरच गोवा यातून बाजुला जाऊ शकेल, असेही कॅप्टन म्हणाले. गोव्यात चांगल्या पर्यटकांची गरज असल्याचेही त्यांनी स्पष्ट केले. सरकारातील प्रत्येकजण केवळ स्वतःच्या फायद्याचाच विचार करीत असल्याचेही ते म्हणाले.

खासदार कॅ. फर्नांडिस यांनी दक्षिण गोवा जिल्हा प्रशासन कार्यालयात लोकांची गाऱ्हाणी ऐकली. माशेल येथील माशेल महिला पतसंस्थेच्या संचालकांनीच कर्जाच्या संदर्भात फसवेगिरी केल्याची तक्रार तेथील काही लोकांनी आपल्याकडे केली, असे खासदार फर्नांडिस यांनी सांगितले. आपण या संदर्भात सहकार निबंधकाकडे तसेच डीओसीकडे तक्रार नोंद करणार आहे. या पतसंस्थेतील भागधारकांचीही फसवणूक झाल्याचे आपल्याला कळले, असे फर्नांडिस म्हणाले.