CM Pramod Sawant: तर दिव्यांगांना उमेदवारी देण्याचा विचार केला जाऊ शकतो!

CM Pramod Sawant: दिव्यांग व्यक्तीने जर निवडणुकीसाठी पुढाकार घेतला. त्यांनी जनतेचे नेतृत्व केले, तर अशा व्यक्तीला निश्‍चितपणे उमेदवारी देण्याचा विचार केला जाऊ शकतो, असे प्रतिपादन मुख्यमंत्री डॉ. प्रमोद सावंत यांनी केले. ते पर्पल महोत्सवातील कार्यक्रमात माध्यमांशी बोलत होते.

यावेळी समाजकल्याण मंत्री सुभाष फळदेसाई, दिव्यांगजन आयुक्त गुरुप्रसाद पावस्कर व इतर उपस्थित होते. डॉ. सावंत पुढे म्हणाले, ज्याप्रमाणे आता महिलांना आरक्षण मिळाले, तसे भविष्यात दिव्यांगांना आरक्षण मिळू शकते. पहिल्यांदा पंचायत, जिल्हा, आणि नंतर विधानसभा, लोकसभेच्या अनुषंगाने टप्प्या-टप्प्याने आरक्षण मिळू शकते. पर्पल फेस्टच्या माध्यमातून दिव्यांगांच्या राजकीय सहभागाबाबत चर्चेला सुरवात झाली आहे, असेही मुख्यमंत्री म्हणाले.

सर्वसमावेशक भारत संकल्पनेवर भर

पंतप्रधान नरेंद्र मोदी तंदरूस्त भारत, (फीट इंडिया) कौशल्य भारत, आणि सर्वसमावेशक भारत यावर अधिक भर देत आहेत. ज्यावेळी आम्ही सर्वसमावेशकता म्हणतो, तेव्हा शारिरीक, मानसिक आणि सामाजिक समावेशताही त्यात येते, असे डॉ. प्रमोद सावंत यांनी सांगितले.