Canacona News: भंगारअड्डे ‌न हटविल्यास पालिकेविरोधात उपोषण; काणकोणच्या नगरसेवकाचा इशारा

काणकोण पालिका क्षेत्रातील भंगार अड्डे ‌न हटविल्यास काणकोण पालिकेचे नगरसेवक धिरज नाईक गावकर मंगळवारी (ता.२३) उपोषण करणार आहेत. यासंबंधी गेले चार महिने प्रत्येक पालिका बैठकीत आवाज उठवूनही पालिका प्रशासन काहीच कारवाई करत नाही. त्यामुळे या सुस्त पालिका प्रशासनाच्या विरोधात येत्या मंगळवारी उपोषण करणार असल्याचे निवेदन नगरसेवक धिरज नाईक गावकर यांनी उपजिल्हाधिकारी, पोलिस उपअधीक्षक व पालिका प्रशासनाला दिले आहे.

पालिका क्षेत्रात नऊ अनधिकृत भंगारअड्डे आहेत. ११ मार्चला झालेल्या पालिका मंडळाच्या बैठकीत या अनअधिकृत भंगारअड्ड्यांविरुद्ध कारवाई करण्याचा ठराव सर्वानुमते घेण्यात आला होता. मात्र, त्या ठरावाची कारवाई होत नसल्याने उपोषणाचा निर्णय घेण्यात आला आहे, असे नगरसेवक नाईक गावकर यांनी सांगितले.

भंगारअड्ड्यांना नोटिसा

यासंदर्भात पालिका मुख्याधिकाऱ्यांनी अनधिकृत भंगारअड्ड्यांना नोटिसा पाठवून दिल्या असल्याचे सांगितले. बैठकीत नगरसेवकांनी घेतलेल्या ठरावाची कारवाई करण्यात येत असल्याचे नगराध्यक्ष सारा नाईक देसाई यांनी सांगितले.