Canacona News : ‘लोकोत्सवा’साठी सभापतींनी केले कार्यकर्त्यांना मार्गदर्शन

Canacona News : काणकोण येथे ८ ते १० डिसेंबर दरम्यान होऊ घातलेल्या लोकोत्सवानिमित्त मुख्य कार्यकर्त्यांची बैठक आदर्श ग्राम आमोणे येथे शनिवारी घेण्यात आली.

यावेळी प्रमुख पाहुणे म्हणून सभापती आणि आदर्श युवा संघाचे अध्यक्ष रमेश तवडकर, तसेच आदर्श युवा संघाचे सचिव अशोक गावकर, श्रीस्थळ पंचायतीच्या सरपंच सेजल गावकर, खोतीगावचे सरपंच आनंदू देसाई, पंच गणेश गावकर, नगरसेवक लक्ष्मण पागी उपस्थित होते.

सभापती तवडकर म्हणाले, की आदर्श युवा संघ ही संघर्षातून निर्माण झालेली संघटना आहे. याची जाणीव सर्वांना असावी, त्याकरिता सर्वांनी एकजुटीने प्रयत्न करावे. आदर्श युवा संघाचे एक स्वप्न होते ते म्हणजे संघटनेची स्वत:ची एक शाळा असावी ते स्वप्न आज सत्यात उतरले आहे.

शाळेतील शिक्षक अन् शिक्षकेतर कर्मचारी प्रामाणिकपणे काम करतात. त्यामुळे विद्यालय विविध माध्यमातून यशोशिखरावर पोहचले आहे. तुमच्या विश्वासावरच लोकोत्सव आणि श्रमधाम संकल्पना यशस्वी होत आहे. गोव्यातील नामवंत सामाजिक कार्यकर्त्यांचे सत्कार करण्याचे कारण म्हणजे आदरयुक्त सद्भावना निर्माण व्हावी एवढेच.

लोकोत्सव ही सांस्कृतिक आणि सामाजिक विचारसरणीचे प्रदर्शन आहे. अनेक हात नकळतपणे आदर्श ग्रामात वावरत आहेत. कोणतीही गोष्ट सहज साध्य होत नाही, त्यासाठी घामगाळणारा कार्यकर्ता पाहिजे तशी कार्यपद्धती प्रत्येक कार्यकर्त्यातआहे. अशोक गावकर यांनी आभार मानले.