Canacona: मित्राला सोडण्यासाठी गेला पण परत आलाच नाही; काणकोण येथे 20 वर्षीय युवकाचा अपघाती मृत्यू

Canacona Accident News: काणकोण येथे सोमवारी मध्यरात्री झालेल्या अपघातात गंभीर जखमी एका 20 वर्षीय युवकाचा मृत्यू झाला आहे. हा युवक मूळ कर्नाटकातील असून तो सध्या न्यूवाडा भाटपाल येथे राहत होता. एका मित्राला घरी पोहचवून येताना हा अपघात झाला. या अपघातात अन्य दोघे युवक जखमी झाले असून एकावर रुग्णालयात उपचार सुरु आहेत.

काणकोण पोलिस स्थानकाचे निरीक्षक चद्रकांत गावस यांनी दिलेल्या माहितीनुसार, तीघे युवक आपल्या मित्राला घरी सोडण्यासाठी कर्वे येथे गेले होते. तेथून परत येत असताना  ट्रिपल सीट येत होते. यावेळी त्यांची बाईक एका वळणावर येताच रस्त्याच्या बाहेर जाऊन झाडाला धडकली.

या धडकेत पुंडलिक काकडे (20) हा युवक गंभीर जखमी झाला तर रोहित नाईक (19), गणेश दोड्डामनी (26) जखमी झाले. पुंडलिकला रुग्णालयात दाखल केले असता त्याला मृत घोषित करण्यात आले.

मृतदेहाची उत्तरीय तपासणी केल्यानंतर मृतदेह त्याच्या नातेवाईकांकडे सुपुर्द करण्यात आला. पुंडलिक हा खासगी वाहन चालवत असे तर त्याचे आईवडिल घरोघर जाऊन भांडी विकण्याचा व्यवसाय करतात.