Goa Fire in Forest: डोंगराला लागलेल्या आगींमागे बिल्डर लॉबी; आमदार विरेश बोरकर यांचा आरोप

Goa Fire in Forest: डोंगरांना लागलेल्या आगींच्या मागे बिल्डर लॉबी कार्यरत आहे. त्यांना या जमिनी बळकावयाच्या आहेत, असा आरोप रिव्होल्युशनरी गोवन्स पक्षाचे आमदार विरेश बोरकर यांनी केला.

गोव्यातील आजोशी मंडूर पंचायत क्षेत्रातील पारपोई मंडूर इथल्या डोंगराला मुद्दामहून आग लागल्याची घटना दोन दिवसांपुर्वी घडली होती. दोन दिवस ही आग धगधगत होती. रेव्होलुशनरी गोवन्सच्या कार्यकर्ते रात्री उशिरापर्यंत ह्या आगीवर नियंत्रण आणण्याचे प्रयत्न करत होते. परंतु दुसऱ्या दिवशी सुद्धा ही आग धगधगत होती.

सोमवारी रिव्होल्युशनरी गोवन्सचे सांत आंद्रेतील आमदार विरेश बोरकर हे घटनास्थळी पाहणी करण्यासाठी गेले होते. डोंगराच्या मोठ्या भागात आग लागल्याचे निदर्शनास आले. त्याचबरोबर तिथे अनेक झाडांची कत्तलदेखील झाली आहे.

या वेळी बोलताना विरेश बोरकर म्हणाले की, सध्या राज्यात अनेक ठिकाणी आग लागण्याच्या घटना घडत आहेत. आग लावण्याचे प्रकार हे मुद्दामहून केले जात असून, बडी बिल्डर लॉबी या प्रकरणात गुंतली आहे. बिल्डर लॉबीची नजर आता गोवेकरांच्या डोंगरावर असून ती कशी बळकावायला मिळते त्याकडे त्यांचे लक्ष आहे, असा आरोपही आमदार विरेश बोरकर यांनी केला आहे.

दरम्यान, आजीच्या कार्यकर्त्यांनी बेकायदा कत्तलीपासून झाडांच्या रक्षणासाठी प्रतिकात्मक आंदोलन केले. त्यांनी झाडांना बँड बांधत वृक्ष संवर्धनाबाबत जागृती केली.