Kasaravarne News : कासारवर्णे येथील साकव धोकादायक

Kasaravarne News : मोरजी, कासारवर्णे येथील महादेव मंदिर परिसरात मुख्य रस्त्यावर असलेला साकव केव्हाही कोसळू शकतो.

या साकवाखालील काँक्रिट पूर्णपणे गळून गेले असून लोखंड गंजलेले दिसून येते. या साकवाची त्वरित दुरुस्ती करावी, अथवा नवीन साकव उभारावा, अशी मागणी होत आहे.

हा साकव कोसळला तर मंदिर आणि इतर परिसरात जाण्यासाठी पर्यायी रस्ता नाही. त्यासाठी सरकारने विनाविलंब या साकवाची दुरुस्ती करावी किंवा या ठिकाणी नवीन साकव उभारावा. स्थानिक पंचायतीने यासंदर्भात ठरावही घेतला आहे.

काँग्रेसचे नेते ॲड. जितेंद्र गावकर, उदय महाले, भास्कर नारुलकर आदींनी नुकतीच या साकवाची पाहणी केली.

यावेळी गावकर यांनी समस्या सोडवण्यास सरकार अपयशी ठरत असल्याचा आरोप केला. हा साकव कोसळला तर मोठी दुर्घटना घडू शकते. सरकारने तातडीने या ठिकाणी नवीन साकव उभारण्यासाठी प्रयत्न करावेत, असे त्यांनी सांगितले.