Goa ST Reservation : ...अन्यथा लोकसभा निवडणुकीवर बहिष्कार

2024 साली होणाऱ्या लोकसभा निवडणुकीपूर्वी राज्यातील एसटी समाजाला राजकीय आरक्षण जाहीर केले नाही तर एसटी समाजाकडून लोकसभा निवडणुकीवर बहिष्कार टाकण्यात येईल.

समाजातील काहीजण निवडणुकीवर बहिष्कार टाकणार नसल्याचे सांगत आहेत, ते चुकीचे असून एसटी समाज आपल्या मतावर ठाम आहे, असे प्रतिपादन मिशन फॉर पॉलिटिकल रिझर्वेशन संघटनेचे अध्यक्ष ॲड. जॉन फर्नांडिस यांनी सांगितले.

संघटनेच्या पणजी कार्यालयातील पत्रकार परिषदेत ते बोलत होते. यावेळी रूपेश वेळीप, रवींद्र वेळीप, रामा काणकोणकर, कॉस्तातिनो फालेरो व इतर पदाधिकारी उपस्थित होते.

आम्हाला एसटी समाज तसेच विविध संघटनांचा पूर्ण पाठिंबा असून आम्ही गाव पातळीवर जागृती करत आहोत. 13 एप्रिल रोजी मडगाव येथे झालेल्या संघटनेच्या बैठकीत एसटी समाजातील विविध 14 संघटना तसेच समाजातील जिल्हा पंचायत सदस्य तसेच पंच यांच्या उपस्थितीत दोन ठराव घेण्यात आले. त्यात राजकीय आरक्षण न मिळाल्यास लोकसभा निवडणुकीवर बहिष्कार टाकणे तसेच गाव पातळीवर जागृती करणे यांचा समावेश आहे.

आमदारांवरही दबाव

मुख्यमंत्री डॉ. प्रमोद सावंत यांनी विधानसभेच्या 2027 च्या निवडणुकीपूर्वी एसटी समाजाला राजकीय आरक्षण देण्याचे विधान केले. त्याचीच ‘री’ एसटी समाजाचे सभापती रमेश तवडकर, मंत्री गोविंद गावडे, आमदार गणेश गावकर, आंतोनियो वाझ हे ओढत आहेत, अशी टीका यावेळी करण्यात आली.

मडकईकरांचे विधान चुकीचे

17 एप्रिल रोजी एसटी समाजाचे नेते तथा जिल्हा पंचायत सदस्य धाकू मडकईकर आणि सुरेश केपेकर जे भाजपशी संबंधित आहेत, त्यांनी पत्रकार परिषद घेऊन एसटी समाज लोकसभा निवडणुकीवर बहिष्कार टाकणार नसल्याचे सांगितले. ते चुकीचे आहे.

मडगावातील बैठकीत धाकू मडकईकर उपस्थित होते. त्यावेळी त्यांनी या निर्णयाला विरोध केला नाही. परंतु मडकईकरांनी पक्षीय दबावाला बळी पडून चुकीची विधाने करू नयेत, असे रूपेश वेळीप म्हणाले.