Manohar International Airport: ‘मोपा’वर ‘ब्ल्यू कॅप टॅक्सी स्टॅंड’चे आश्वासन हवेतच

आंतरराष्ट्रीय मोपा विमानतळावर पेडणे तालुक्यातील टॅक्सी व्यावसायिकांसाठी ‘ब्ल्यू कॅप टॅक्सी स्टॅंड’ देण्याचे मुख्यमंत्री डॉ. प्रमोद सावंत यांनी आश्वासन दिल्यास पंधरा दिवस उलटून गेले. (Mopa International Airport )

पण या टॅक्सी स्टॅंडसाठी कसल्याही हालचाली दिसत नाहीत. उलट मोपा विमानतळावर तालुक्याबाहेरील टॅक्सी धारक व्यावसायिक व्यवसाय करत आहेत.

सरकारने तातडीने आश्वासन पूर्ण न केल्यास आंदोलन छेडू, असा इशारा आज पत्रकारांशी बोलताना भास्कर नारूलकर यांनी दिला.

पेडणे तालुक्यातील मोपा विमानतळावर टॅक्सी व्यवसायासाठी इच्छुक असलेल्यांना माहिती हक्क कायद्यांतर्गत काही प्रश्नांची उत्तरे सरकारने द्यावीत, यासाठी ॲड. जितेंद्र गावकर ,भास्कर नारुलकर यांच्या नेतृत्वाखाली पेडणे वाहतूक कार्यालयाचे अधिकारी कमलाकर कारापुरकर यांना निवेदन देण्यात आले.

त्यानंतर पेडणे कदंब बस स्थानकात नारूलकर पत्रकारांशी बोलत होते. यावेळी ॲड जितेंद्र गावकर उमेश तळवणेकर यांच्यासह सोबत टॅक्सी धारक उपस्थित होते.

यावेळी भास्कर नारूलकर म्हणाले की, 5 जानेवारी रोजी मुख्यमंत्री,वाहतूक मंत्री माविन गुदिन्हो व पर्यटन मंत्री रोहन खंवटे यांच्या सोबत पेडण्याचे आमदार प्रवीण आर्लेकर हे होते.

या घटनेला आता पंधरा दिवस उलटून गेले तरी विमानतळावर ब्ल्यू कॅप टॅक्सी स्टॅंड देण्याच्या दृष्टीने अजून कसल्याही हालचाली नाहीत.

सरकारकडून टॅक्सी व्यावसायिकांची थट्टा !

सरकारने पेडणे वाहतूक कार्यालयात अर्थहिन अर्ज भरून द्या म्हणून आमच्या टॅक्सी धारकांची थट्टा चलवली आहे.

सरकार अशा प्रकारे आमची फसवणूक करत असल्याने विधानसभेवर मोर्चा ,वाहतूक कार्यालवार मोर्चा,मोपा विमानतळाबाहेर ‘चक्का जाम’ सारखी आंदोलन करण्याचे चर्चेअंती ठरवून निर्णय घेणार आहोत,असे भास्कर नारूलकर आणि जितेंद्र गावकर यांनी सांगितले.