‘रेन रन’मध्ये दिसणार प्रदीप, मारियोलाची जिद्द

पणजी : आगामी ‘रोटरी रेन रन’मध्ये ब्लेड रनर प्रदीप कुंभार व कर्करोगावर मात केलेल्या मारियोला मथायस यांची जिद्दी दिसेल. ते या शर्यतीचे सदिच्छा दूत असतील.

रोटरी रेन रन येत्या 31 जुलै रोजी बांबोळीतील ॲथलेटिक्स स्टेडियमवर होईल. कर्करोगाचे लवकर निदान, महिलांचे आरोग्य आणि शिक्षणाला पाठिंबा देण्याच्या उद्देशाने शर्यत घेण्यात येत आहे.

मुंबईतील विमा कंपनीत वरिष्ठ व्यवस्थापक असलेले प्रदीप 52 वर्षीय आहेत. 2018 मध्ये ट्रायथलॉन स्पर्धेसाठी सायकलिंगचा सराव करत असताना मुंबईतील महामार्गावर ट्रक अपघातात त्यांना उजवा पाय गमवावा लागला.

त्यांना तब्बल आठ महिने इस्पितळात राहावे लागले होते. त्यानंतर जिद्दीने प्रदीप यांनी ॲथलिट या नात्याने यशस्वी पुनरागमन केले. कृत्रिम पायासह ते 2019 मध्ये चालू लागले, नंतर हळूहळू धावणे, सायकलिंग व जलतरणात ते तरबेज बनले.

उजव्या पायाला ब्लेड बसविल्यानंतर 2021 मध्ये त्यांनी 10 किलोमीटर रोड रेसमध्ये भाग घेतला. राष्ट्रीय मास्टर्स जलतरण स्पर्धेतही त्यांनी कितीतरी पदके जिंकली आहेत.

पणजी येथील मारियोला 61 वर्षीय असून त्या हौशी धावपटू आहेत. 2019 मध्ये त्यांना कर्करोगाचे निदान झाले. 2020 मध्ये त्यांनी उपचार पूर्ण केले. सुरवातीस दररोज वेगाने चालणे व योग यावर त्यांनी भर दिला.

नंतर जलतरण, सायकलिंग, धावणे त्यांच्या नित्यक्रमाचा भाग बनला. ‘‘प्रत्येक सकाळी थोडेफार खेळणे हे माझे प्रेम होते, पण नंतर आरोग्याने धक्का दिला. पुनरागमनाची तीव्र इच्छा होती. एखाद्या खेळाचा सराव केल्याने केवळ शारीरिक शक्ती प्राप्त होत नसून आव्हानास सामोरे जाताना मानसिकत कणखरताही लाभते,’’ असे मारियोला म्हणाल्या.