'काँग्रेस फोडण्यासाठी भाजपचे प्रयत्न, कोट्यांवधींचे आमिष'

पणजी : भाजपला पराभव स्पष्ट दिसत असल्यामुळे सत्तेसाठी काँग्रेसचे आमदार फोडण्यासाठी प्रयत्न सुरू झाले आहे. एका आमदाराला कोट्यांवधी रुपये देण्याचे आमिष दाखवले जाते आहे. यासाठी विश्‍वजित राणे, मुख्यमंत्री डॉ. प्रमोद सावंत (Pramod Sawant) काँग्रेस उमेदवारांच्या शोधात आहेत. तसेच भाजपतर्फे (BJP) पोस्टल मतदाराला 10 हजार रुपये देण्यात येत आहे. काहींवर दबाव टाकला जात आहे, असा आरोप काँग्रेसचे प्रदेशाध्यक्ष गिरीश चोडणकर (Girish Chodankar) यांनी पत्रकार परिषदेत केला.

यावेळी त्यांच्यासोबत काँग्रेसचे (Congress) अमरनाथ पणजीकर उपस्थित होते. चोडणकर पुढे म्हणाले, मतदारांनी भाजपला नाकारलेले आहे. कारण भ्रष्टाचार, नोकरभरती घोटाळ्यामुळे जनतेचे मोठे नुकसान झाले. विकासाच्या नावावर फसवणुक केली. काँग्रेस व इतर पक्ष फोडून सत्ता टिकवली, याचा राग जनतेने मतदानाद्वारे काढला आहे. त्यामुळे पराभव दिसत असल्यामुळेच त्यांनी पुन्हा सत्तेत येण्यासाठी त्यांचे प्रयत्न सुरू आहेत. पण कॉंग्रेसचे कोणीही फुटणार नाही.