भाजप कार्यकर्ताही होऊ शकतो आमदार: मुख्यमंत्री प्रमोद सावंत

मोरजी: आजचा हा सत्कार एका भाजप कार्यकर्त्याचा आहे. बहुजन समाजातील एक साधा आणि सच्चा कार्यकर्ताच भाजपमधून आमदार होऊ शकतो, याचे उल्हास तुयेकर हे उदाहरण आहे, असे प्रतिपादन मुख्यमंत्री प्रमोद सावंत यांनी केले.

नावेली मतदारसंघाचे भाजपचे आमदार तथा तुये गावचे सुपुत्र उल्हास तुयेकर यांचा त्यांच्या मूळ तुये गावी श्री भगवती देवस्थान आणि तुये ग्रामस्थांतर्फे मुख्यमंत्री प्रमोद सावंत यांच्या हस्ते हृद्य सत्कार कारण्यात आला. यावेळी भाजपचे प्रदेशाध्यक्ष सदानंद शेट तानावडे, मांद्रेचे आमदार जीत आरोलकर, माजी आमदार दयानंद सोपटे, श्री भगवती देवस्थान समितीचे अध्यक्ष चंद्रशेखर नाईक, कार्याध्यक्ष ज्ञानेश्वर नाईक, पदाधिकारी प्रकाश नाईक, रोहिदास नाईक, संतोष नाईक, दत्तात्रय नाईक, सत्यवान नाईक आणि मान्यवर उपस्थित होते.

यावेळी सदानंद शेट तानावडे, दयानंद सोपटे यांनीही मनोगत व्यक्त केले. ज्ञानेश्वर नाईक यांनी स्वागत केले. चंद्रशेखर नाईक यांनी प्रास्ताविक केले. सिद्धी नाईक यांनी मानपत्राचे वाचन केले.