'भाजप आणि काँग्रेसने गोव्यातील लोकांसाठी काहीही केलेले नाही'

पणजी: दिल्लीचे मुख्यमंत्री आणि आम आदमी पक्षाचे (आप) राष्ट्रीय सर्वेसर्वा अरविंद केजरीवाल शनिवारी दोन दिवसीय गोवा दौऱ्यावर आले आहेत. याकाळात त्यांनी घरोघरी जाऊन पक्षाचा प्रचार केला. केजरीवाल यांनी सांता क्रुझ येथे तरुणांसोबत सभा घेतली आणि शिरोडा येथे प्रचार केला. (Arvind Kejriwal Goa Election Latest News)

अरविंद केजरीवाल (Arvind Kejriwal) यांनी मतदारांना येत्या गोवा विधानसभा निवडणुकीत 'आप'ला (AAP) संधी देण्याचे आवाहन केले. यावेळी त्यांनी आश्वासनांचा पाढा वाचून दाखवला. "बदलासाठी मतदान करण्यासाठी लोक उत्साही आहेत. भाजप आणि काँग्रेसने या लोकांसाठी काहीही केले नाही. तरुण घरी बसले आहेत कारण त्यांच्याकडे नोकऱ्या नाहीत. बेरोजगारी ही एक मोठी समस्या आहे," केजरीवाल म्हणाले.

ते पुढे म्हणाले, "गोव्यात 'आप'चे सरकार आले तर पर्यटन क्षेत्र विकसित केले जाईल. गोव्यात 24 तास मोफत वीज आणि पाणी दिले जाईल. रस्ते सुधारले जातील आणि सर्व सरकारी शाळांमध्ये मोफत शिक्षण दिले जाईल. उत्तम आणि मोफत आरोग्य सेवेसाठी गोव्यातील प्रत्येक गावात आणि जिल्ह्यात मोहल्ला दवाखाने आणि रुग्णालये उघडली जातील. शेतकरी वर्गाशी चर्चा करून शेतीचे प्रश्न सोडवले जातील. व्यापार व्यवस्था सुव्यवस्थित आणि सरलीकृत केली जाईल."

त्यांनी शिरोड्याचे उमेदवार महादेव नाईक यांच्यासोबत प्रचार केला. "आम आदमी पक्षाकडून खूप अपेक्षा आहेत, आणि जर 'आप'ने सरकार स्थापन केले तर आम्ही या अपेक्षा पूर्ण करण्याचा प्रयत्न करू. लोकांना प्रामाणिक पर्याय हवा आहे," असे ते म्हणाले. 'आप'ने गोव्यात (Goa) अनेक निवडणूक आश्वासने जाहीर केली आहेत, ज्यात दरमहा 300 युनिटपर्यंत मोफत वीज, मोफत तीर्थयात्रा, स्थानिकांना रोजगार हमी आणि 18 वर्षांपेक्षा जास्त वयाच्या महिलांसाठी आर्थिक सहाय्य योजना यांचा समावेश आहे. याचबरोबर त्यांनी गृह आधार भत्ता 1,500 रुपयांवरून 2,500 रुपये प्रति महिना करण्याचे आश्वासन दिले आहे.