अंधाऱ्या रात्रीत डिव्हायडरजवळ पडला, दारूच्या नशेत उठणंही होतं मुश्किल; 'बिट्स पिलानी'च्या विद्यार्थ्याचा राडा

student drunk case goa: गोव्यातील प्रतिष्ठित शिक्षण संस्था 'बिट्स पिलानी, गोवा कॅम्पस' पुन्हा एकदा विद्यार्थ्यांच्या वर्तनामुळे चर्चेत आली आहे. मंगळवारी (दि.२८) रात्री कॅम्पसजवळच्या वास्को-वर्णा महामार्गावर एका विद्यार्थ्याला अत्यंत नशेत रस्त्याच्या दुभाजकाजवळ पडलेले पाहिले गेले. या घटनेचा व्हिडिओ बुधवारपासून सोशल मीडियावर मोठ्या प्रमाणात व्हायरल झाला आहे.

व्हायरल व्हिडिओमध्ये दिसले गंभीर चित्र

व्हायरल झालेल्या व्हिडिओमध्ये, तो विद्यार्थी रस्त्याच्या दुभाजकाजवळ पडलेला असून, त्याला स्वतःहून उठणेही शक्य नव्हते. महामार्गावरून वाहने वेगाने जात असताना, तो खाली पडलेला होता. व्हिडिओमध्ये तीन तरुण त्या विद्यार्थ्याला उभे करण्याचा प्रयत्न करताना दिसले आणि खूप प्रयत्नानंतर ते त्याला उभे करू शकले.

स्थानिक नागरिकांनीही घटनास्थळी धाव घेतली. व्हिडिओ रेकॉर्ड करणाऱ्या व्यक्तीने चिंता व्यक्त केली की, एवढ्या नशेत असलेल्या विद्यार्थ्याला महामार्गावरील वेगाने येणारी कोणतीही गाडी सहज धडक देऊ शकली असती. हा विद्यार्थी इतक्या रात्री कॅम्पसच्या बाहेर, महामार्गावर नशेत कसा आला, असा सवालही नागरिकांनी उपस्थित केला.

संस्थेकडून 'वैद्यकीय देखरेख' आणि शिस्तभंगाची कारवाई

या प्रकरणाची पुष्टी करताना बिट्स गोवा कॅम्पसचे जनसंपर्क मुख्य व्यवस्थापक अर्जुन सी. हालर्णकर यांनी माहिती दिली की, 'वास्को-सांकवाळ महामार्गाजवळ आढळलेला हा तरुण त्यांच्या कॅम्पसचा विद्यार्थी आहे.'

या विद्यार्थ्यावर कोणती कारवाई होणार, या प्रश्नावर हालर्णकर यांनी उत्तर दिले की, "तो विद्यार्थी सध्या वैद्यकीय देखरेखीखाली आहे. बिट्सच्या शिस्तपालन प्रक्रियेनुसार, त्याला त्याच्या वर्तनावर स्पष्टीकरण देण्याची संधी दिली जाईल." या घटनेनंतर त्या विद्यार्थ्याला सुरक्षितपणे कॅम्पसमध्ये परत नेण्यात आले आहे.

कॅम्पसचे नियम आणि सुरक्षेचे प्रश्न

कॅम्पसच्या नियमांनुसार विद्यार्थ्यांना बाहेर जाण्यासाठी आणि परत येण्यासाठी निश्चित वेळ दिलेला आहे. हालर्णकर यांनी सांगितले की, विद्यार्थ्यांना कामकाजाच्या दिवशी संध्याकाळी ५ वाजल्यापासून बाहेर जाण्याची परवानगी आहे आणि रात्री १०.३० पर्यंत त्यांना कॅम्पसमध्ये परतणे अनिवार्य आहे. नियमांचे उल्लंघन केल्यास योग्य ती शिक्षा केली जाते.

गेल्या वर्षभरात कॅम्पसमध्ये पाच विद्यार्थ्यांच्या मृत्यूच्या घटना घडल्यामुळे ही संस्था आधीच सुरक्षेच्या कारणांवरून चर्चेत होती. सुरक्षेची मागणी वाढल्यावर, संस्थेने नुकतेच ६०० सीसीटीव्ही कॅमेऱ्यांची स्थापना आणि पार्सलची तपासणी यांसारखे कठोर उपाय सुरू केले आहेत. या पार्श्वभूमीवर, विद्यार्थ्याचे असे गैरवर्तन संस्थेच्या नियमांवर आणि सुरक्षेच्या उपाययोजनांवर प्रश्नचिन्ह उभे करत आहे.