मडगाव: बीटकॉईनमध्ये ४.६० कोटी रुपये गुंतवणूक करून त्यानंतर फसवणूक केल्याचा आरोप असलेल्या मूळ पश्चिम बंगाल येथील सुकांता भौमिक (४३) या संशयिताचा जामीन अर्ज मडगावच्या सत्र न्यायालयाने फेटाळून लावला. या संशयिताला जामिनावर सोडल्यास तो फरार होण्याची शक्यता असल्याचे न्यायालयाने आदेशात म्हटले आहे. दक्षिण गोव्याच्या मुख्य सत्र न्यायाधीश शेरीन पॉल यांच्या न्यायालयाने हा आदेश दिला. सरकार पक्षातर्फे सरकारी वकील एस. सामंत यांनी काम पाहिले.
सुकांता भौमिक या संशयिताला इकॉनॉमिक ऑफेन्स सेल पोलिस स्थानकाच्या पोलिसांनी अटक केली होती. भारतीय दंड संहितेच्या ४०६ (अफरातफर करणे), ४२० (फसवणूक करणे) त्याचप्रमाणे गोवा प्रोटेक्शन ऑफ इंटरेस्ट ऑफ डिपोझीटर्स (इन फायनान्शियल इस्टाब्लीशमेंट) अॅक्ट १९९९ च्या ३ व ५ कलमाखाली आणि बॅनिंग ऑफ अनरेगुलेटेड डिपॉझिट स्कीम अॅक्ट २०१९ च्या ३ व ४ कलमाखाली संशयिताविरुद्ध गुन्हा नोंद करण्यात आला होता.
पश्चिम बंगालातील या संशयिताच्या जामीन अर्जाला पोलिसांनी आक्षेप घेताना अनेक कारणे सादर केली. अर्जदार सुकांता भौमिक व अजय दोडामणी हे या प्रकरणातील संशयित आरोपी आहेत. या दोन्ही संशयित आरोपींनी तक्रारदाराला तसेच तक्रारदाराच्या कुटुंबाच्या सदस्यांना आणि नातेवाइकांना ‘गोवन गेम्स ऑन लाईन सर्व्हीसेस प्रायव्हेट लिमिटेड या नावाने आमची कंपनी असून ही कंपनी क्रिप्टो ट्रेडिंगमध्ये व्यवहार करीत असून मोठ्या प्रमाणात परतावा देते असा प्रस्ताव या संशयिताने तक्रारदाराला दिला.
पोलिसांनी न्यायालयात सादर केलेल्या कागदपत्रानुसार तक्रारदाराने या कंपनीकडे २२ लाख ६९ हजारांची गुंतवणूक केली. त्यानंतर तक्रारदार व त्यांच्या कुटुंबातील इतर सदस्यांनी बिट काईनमध्ये ४ कोटी ६० लाख रुपयांची गुंतवणूक केली आणि या प्रकरणातील अर्जदाराने तक्रारदार व त्यांच्या कुटुंबातील लोकांची एकूण ४ कोटी ६० लाख रुपयांची अफरातफर केल्याचे तक्रारीत म्हटलेले आहे.
अशा या संशयिताला जामिनावर सोडू नये असा पोलिसांनी न्यायालयात दावा केला.अर्जदार सुकांता भौमिक हा फरार होण्याची शक्यता आहे. अर्जदाराला जामिनावर सोडल्यास या प्रकरणासंबंधी ज्या-ज्या लोकांना माहिती आहे त्या सर्वांना ही माहिती दडवून ठेवण्यासाठी त्यांच्यावर दडपण आणण्याची शक्यता आहे, या प्रकरणातील पुराव्यात संशयित ढवळाढवळ करण्याची शक्यता आहे आणि म्हणून अर्जदार सुकांता भौमिकचा हा अर्ज फेटाळून लावण्याची सरकार पक्षाने मागणी केली.
न्यायालयाला असे दिसून आले की, या प्रकरणातील अर्जदार न्यायालयीन कोठडीत आहेत आणि दुसरा संशयित अजय दोडामणी हा जामिनावर सुटला आहे. मात्र, याच प्रकरणातील दुसरा संशयित सुकांता भौमिकला समान न्याय (पॅरीटी) च्या आधारावर जामिनावर सोडता येणार नाही.
पॅरीटीचा नियम येथे लागू होत नाही, कारण म्हणजे अर्जदार भौमिक गोवन गेम्स ऑनलाइन प्रा. ली.चा संचालक आहे, तर अजय दोडामणी हा त्यांच्याकडे व्यवस्थापक म्हणून काम करत होता. या व्यवहारातून दोडामणीला फायदा झाला असे याक्षणी दिसून आल्याचे सरकार पक्षाकडे पुरावा नाही आणि या आधारावर, आठ कंपन्यांचा मालक संशयित सुकांता भौमिक हा पॅरीटीचा फायदा घेऊ शकत नसल्याचे सांगून न्यायालयाने भौमिकचा जामिनासाठीचा अर्ज फेटाळून लावला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
