Goa Nightclub Fire: रोमियो लेन दुर्घटना प्रकरणात गोवा पोलिसांना मोठं यश! फरार आरोपींविरुद्ध 'ब्लू कॉर्नर'चा फास; इंटरपोलकडून नोटीस जारी

पणजी: गोव्यातील बहुचर्चित 'बर्च बाय रोमियो लेन' या नाईट क्लबला लागलेल्या भीषण आगीच्या घटनेनंतर फरार झालेल्या आरोपींच्या तपासात गोवा पोलिसांना मोठे यश मिळाले. या प्रकरणात पलायन केलेल्या आरोपींना शोधण्यासाठी आंतरराष्ट्रीय पोलीस संघटने (INTERPOL) कडून त्यांच्याविरुद्ध 'ब्लू कॉर्नर नोटीस' (Blue Corner Notice) जारी करण्यात आली.

दोन दिवसांत 'ब्लू कॉर्नर नोटीस' जारी

या कारवाईतील सर्वात महत्त्वाचा आणि उल्लेखनीय भाग म्हणजे, ही 'ब्लू कॉर्नर नोटीस' घटनेच्या अवघ्या दोन दिवसांच्या आत जारी करण्यात आली. अशा प्रकारची आंतरराष्ट्रीय नोटीस जारी करण्यासाठी साधारणपणे एक आठवडा किंवा त्याहून अधिक वेळ लागू शकतो. कारण या प्रक्रियेमध्ये विविध देशांच्या आणि केंद्रीय एजन्सींच्या सहकार्याची आणि आवश्यक कागदपत्रांची पूर्तता करावी लागते.

मात्र, गोवा पोलिसांनी (Goa Police) या प्रकरणाची गंभीरता लक्षात घेऊन त्वरित कार्यवाही केली. गोवा पोलिसांचे अथक प्रयत्न आणि केंद्रीय तपास यंत्रणांचे मिळालेले जलद सहकार्य यामुळे ही प्रक्रिया खूप कमी वेळात पूर्ण झाली. या जलद कारवाईमुळे आरोपींना विदेशात लपून राहणे आता अधिक कठीण होणार आहे.

इंटरपोलने जारी केलेल्या 'ब्लू कॉर्नर नोटीस'मुळे फरार आरोपींच्या हालचालींवर आणि ठिकाणांवर लक्ष ठेवणे आता शक्य होणार आहे. ही नोटीस इंटरपोलच्या 195 सदस्य देशांना पाठवली जाते. या नोटीसमुळे सदस्य देश आरोपींचा ठावठिकाणा, ओळख आणि गुन्हेगारी कारवायांबद्दल माहिती गोळा करण्यास मदत करतात. या नोटिसीमुळे आरोपी त्यांच्या सध्याच्या ठिकाणाहून इतर कोणत्याही देशात स्थलांतर करु शकणार नाहीत. यामुळे ते एका विशिष्ट देशात अडकून राहतील आणि त्यांना पकडणे पोलिसांसाठी सोपे होईल.

तपास आणि पुढील कारवाई

गोवा पोलिसांनी फरार आरोपींविरुद्ध 'लूक आऊट सर्कुलर' जारी केल्यानंतर लगेचच इंटरपोलच्या माध्यमातून आंतरराष्ट्रीय कारवाईसाठी पाऊल उचलले होते. या ब्लू कॉर्नर नोटिसीमुळे तपास आणखी वेगाने पुढे सरकणार आहे. आता आंतरराष्ट्रीय स्तरावर आरोपींचा मागोवा घेण्यासाठी गोव्याचे पोलीस केंद्रीय संस्था आणि इंटरपोलच्या संपर्कात राहून पुढील कारवाई करतील. या जलद आंतरराष्ट्रीय कारवाईमुळे आरोपींना मिळणारे कथित राजकीय संरक्षण आता निष्प्रभ ठरु शकते. गोवा पोलिसांच्या या महत्त्वपूर्ण कामगिरीमुळे या प्रकरणातील फरार आरोपींना लवकरच देशात परत आणून त्यांच्यावर कायदेशीर कारवाई करणे शक्य होणार आहे.