Bicholim: धबधब्यात कोसळले फणसाचे झाड, धोकादायक अवस्थेमुळे पर्यटकांच्यात भीती; त्वरित हालचालीची गरज

डिचोली: गेल्या चार-पाच दिवसांपासून पडणाऱ्या दमदार पावसामुळे डिचोली शहराला जोडून असलेला धबधबा आता हळूहळू प्रवाहित होऊ लागला आहे. दुसऱ्या बाजूने या धबधब्यात कोसळलेले फणसाचे झाड अजूनही तसेच असल्यामुळे धबधब्यावर पावसाळी पर्यटनाची मजा लुटण्यासाठी येणाऱ्यांना अडथळा निर्माण होत आहे.

मिळालेल्या माहितीनुसार, काही दिवसांपूर्वी वादळी वाऱ्यांमुळे धबधब्याच्या मध्यभागी फणसाचे झाड कोसळले आहे. ते झाड अजूनही त्याच अवस्थेत आहे. एखादे वेळी या झाडामुळे अनर्थ घडण्याची भीती व्यक्त होत आहे.

धबधबा देवस्थान परिसरात येत असल्याने धबधब्यावर मद्यप्राशन, मांसाहारी खाद्यपदार्थ वर्ज्य आहेत. असे प्रकार घडू नयेत म्हणून स्थानिकही त्याकडे लक्ष ठेवून असतात, अशी माहिती प्रकाश न्हावेलकर, इंद्रजित केरकर आदी स्थानिकांनी दिली.

दरम्यान, या झाडामुळे स्थानिकांसह पर्यटक या धबधब्यावर मजा लुटण्याचा धोका पत्करत नसल्याचे समजते. त्यामुळे वेळीच हे झाड हटविण्याची गरज निर्माण झाली आहे.

पर्यटकांसाठी धबधबा सुरक्षित

डिचोलीहून सारमानसच्या दिशेने जाताना उजव्या बाजूने रस्त्याला टेकूनच हा धबधबा आहे. डोंगराळ भागातून वाहणारा हा धबधबा प्रत्येकाला आकर्षित करतो. तेथूनच तेथील वाड्याला ‘धबधबा’ या नावाने ओळखण्यात येते. डिचोलीतील मये, लाडफे आदी काही भागात पावसाळ्यात धबधबे प्रवाहित होतात. अन्य धबधब्यांच्या तुलनेत डिचोली शहरातील हा धबधबा सुरक्षित आहे. धार्मिक महत्त्‍व असलेला डिचोलीतील हा धबधबा आंघोळ करण्यासाठी आणि वर्षा पर्यटनासाठी सुरक्षित आहे. त्यामुळे दरवर्षी या धबधब्यावर गर्दी होत असते. आतापर्यंत तरी या धबधब्यावर कोणतीच अनुचित घटना घडलेली नाही, अशी माहिती स्थानिकांनी दिली.