Bicholim Water Crisis: गोव्यातील 'या' भागावर घोंघावतेय पाणीसंकट! जलवाहिनी गळतीमुळे वाढला धोका; हजारो लिटर पाणी वाया

डिचोली: दहा दिवसांपूर्वी डिचोलीत निर्माण झालेली पाणी समस्या सुटली असली, तरी ''त्या'' जलवाहिनीचे स्थलांतरित काम सदोष झाल्याने डिचोलीवर पुन्हा पाण्याचे संकट कोसळण्याची शक्यता आहे. तशी भीतीही जनतेमधून व्यक्त करण्यात येत आहे.

डिचोली शहरातील नाईकनगर-बोर्डे येथील सर्वे क्र. १४९/२ या जमिनीतून गेलेली ६०० मिमी व्यासाची जलवाहिनी स्थलांतरित करण्यासाठी दहा दिवसांपूर्वी म्हणजेच (ता. ७ आणि ८ नोव्हेंबर) असे दोन दिवस मर्यादित पाणी पुरवठा करण्यात येणार, असे ''पीडब्ल्यूडी''ने जाहीर केले होते.

मात्र जाहीर केलेल्या वेळेत जलवाहिनीचे स्थलांतरित करण्याचे काम व्यवस्थितरीत्या पूर्ण कारण्यास संबंधित खात्याला अपयश आले होते. त्यामुळे दोन दिवस नव्हे तर तब्बल साडेतीन दिवस पाण्याची मोठी समस्या उद्भवली होती. परिणामी डिचोलीसह मयेतील बहुतेक भागात पाण्याची मोठी समस्या निर्माण झाली होती.

दहा दिवसांपूर्वी डिचोली शहरातील नाईकनगर-बोर्डे येथे स्थलांतरित केलेल्या जलवाहिनीच्या जोडणीचे काम व्यवस्थित झाले नसल्याने या जलवाहिनीतून  मोठ्या प्रमाणात पाणी झिरपत आहे. गेल्या दहा दिवसांपासून हा प्रकार चालू असून, गुरुवारी सायंकाळपर्यंत जलवाहिनीतून पाणी बाहेर वाहत असल्याचे दिसून येत होते.

त्यामुळे या जलवाहिनीतून दरदिवशी हजारो लिटर पाणी चक्क गटारात वाहून जात आहे. या जलवाहिनीची व्यवस्थितपणे दुरुस्ती करून वाया जाणाऱ्या पाण्याची नासाडी थांबविण्यास संबंधितांना अपयश आले आहे.