Bicholim: अनर्थ टळला! चालकाचे नियंत्रण गेले, कोल्हापूरला जाणारा औषधवाहू ट्रक कलंडला; व्हाळशी जंक्शनवर अपघातांचे सत्र सुरूच

डिचोली: येथील चौपदरी बगलमार्गावरील व्हाळशी जंक्शनवर औषधवाहू ट्रक कलंडला. हा अपघात काल शनिवारी रात्री पावणेबाराच्या सुमारास घडला. सदैवाने अनर्थ टळला.

यासंबंधीची माहिती अशी की, एमएच-०९- ईएम-८७८२ या क्रमांकाचा औषधवाहू ट्रक बगलमार्गावरून अस्नोडामार्गे कोल्हापूरला जात होता. व्हाळशी जंक्शनवरून ट्रक मुख्य रस्त्यावर घेताना जंक्शनवरील वळणावर ट्रकचालकाचे नियंत्रण गेले आणि ट्रक डाव्या बाजूने कलंडला.

गतिरोधक बसवणे गरजेचे

गेल्या वर्षी वाठादेव-व्हाळशी चौपदरी बगलमार्गाचे लोकार्पण झाले. परंतु या बगलमार्गावर वरचेवर अपघात घडत आहेत. आतापर्यंत चौदा ते पंधरा अपघात घडले आहेत. अपघातांवर नियंत्रण ठेवण्यासाठी बगलमार्गावरील रम्ब्लर्स काढून गतिरोधक बसवावेत, अशी मागणी रोहिदास गाड व स्थानिकांनी केली आहे.

दुचाकीची धडक; जखमी महिलेचा मृत्यू

मुगाळी येथे रस्ता ओलांडताना दुचाकीची धडक बसून गंभीर जखमी झालेल्या मोनिका सिल्वा (वय ७८) यांचा ‘गोमेकॉ’त मृत्यू झाला. या अपघात प्रकरणी दुचाकीचालक सुनील तलवार (२८) याच्यावर मायणा कुडतरी पोलिसांनी गुन्हा नोंद केला व त्याला अटक केली. उपनिरीक्षक सोनल गावकर हे पुढील तपास करीत आहेत.

बुधवारी, १० रोजी मुगाळी येथील भगवती टाईल्स फॅक्टरी जवळ हा अपघात घडला होता. मोनिका याच भागातील असून, त्या रस्ता ओलांडत होत्या. यावेळी भरधाव वेगाने आलेल्या दुचाकीची धडक बसल्याने त्या रस्तावर पडल्या. डोक्याला गंभीर इजा झाली होती. त्यांना उपचारासाठी गोमेकॉत दाखल करण्यात आले होते.