निर्जनस्थळी गवत कापताना सापडली कवटी आणि हाडे! वाठादेव-सर्वण परिसरात खळबळ; बेपत्ता वृद्धेचा सांगाडा असल्याचा संशय

डिचोली: डिचोलीतील वाठादेव-सर्वण भागात निर्जनस्थळी मानवी कवटी आणि हाडे आढळून आली असून या प्रकारामुळे परिसरात खळबळ माजली आहे. दरम्यान, घटनास्थळी मिळालेल्या काही वस्तूंवरून हा सांगाडा वाठादेव येथील बेपत्ता सुमती मांद्रेकर या वृद्धेचा असल्याचा प्राथमिक अंदाज आहे.

पोलिसांनी पंचनामा करून कवटी आणि हाडे बांबोळी येथे गोवा वैद्यकीय महाविद्यालयात पाठविल्याची माहिती मिळाली आहे. फॉरेन्सिक तपासणीअंती हाडे कोणाची आणि संबंधित व्यक्तीचा मृत्यू नेमका कसा झाला ते स्पष्ट होणार आहे.

ज्या वृद्धेची ही हाडे असल्याचे प्रथमदर्शनी दिसून आले आहे, ती सुमती मांद्रेकर या वृद्धा राहत्या घरातून दोन महिन्यांहून अधिक काळापासून बेपत्ता आहेत.

दोन महिन्यांपासून बेपत्ता

वाठादेव येथील सुमती मांद्रेकर ही वृद्धा दोन महिन्यांपूर्वी अचानक घरातून बेपत्ता झाल्या होत्या. कालपर्यंत त्यांचा ठावठिकाणा लागला नव्हता. सुमती हिच्या घरापासून साधारण दोन किलोमीटर अंतरावर ‘धाट’ या निर्जनस्थळी गवत कापताना ही कवटी आणि हाडे आढळून आली आहेत. येथे मिळालेले फाटलेले लुगड आणि अन्य वस्तूंवरून ही हाडे सुमती मांद्रेकर हिचीच असल्याचे प्रथमदर्शनी स्पष्ट झाले आहे. सुमती मांद्रेकर ही वृद्धा मानसिकरित्या कमकुवत होती.