Bison In Bicholim: सर्वण भागात गव्यांचा धुमाकूळ, केळी, काजू कलमांची नासधूस; Watch Video

डिचोली: डिचोली तालुक्यातील गोकुळवाडा - सर्वण भागात सध्या गव्यांचा संचार वाढला असून रात्री तसेच दिवसा हे गवे लोकवस्तीजवळ फिरत आहेत, अशी माहिती स्थानिकांकडून मिळाली आहे. या गव्यांनी परिसरात सध्या उच्छाद मांडला असून बागायती पिकांची नासधूस सुरू केली आहे.

लोकवस्तीजवळच कळपाने गवे संचार करीत असल्याने नागरिकांमध्ये घबराट पसरली आहे. बागायतदारही चिंतेत आहेत. गव्यांच्या दहशतीमुळे बागायतदार बागायतींत जाण्याचे धाडस करीत नाहीत.

मिळालेल्या माहितीनुसार, किमान पाच ते सहा गवे कळपाने या परिसरात मुक्तपणे संचार करीत आहेत. गव्यांची दहशत वाढण्यापूर्वीच वन खात्याने या गव्यांचा बंदोबस्त करावा, अशी मागणी गोकुळवाडा-सर्वण भागातील नागरिकांकडून होत आहे. गेल्या जवळपास सात-आठ दिवसांपासून लाखेरे भागात गव्यांचा संचार सुरू असल्याची माहिती मिळाली आहे.

केळी, काजू कलमांची नासधूस

रात्रीच्यावेळी हे गवे गोकुळवाडा भागातील बागायतींत घुसतात. गोकुळवाडा येथील बागायतदार दयानंद सावंत, गणपत सावंत आणि इतरांच्या बागायतीत हे गवे फिरल्याच्या पावलांच्या खुणाही उमटल्याचे आढळून येत आहे. गव्यांकडून त्यांच्या बागायतीतील केळी तसेच काजूची रोपे जमीनदोस्त करण्यात आली आहेत. हे गवे आक्रमक झाले, तर माणसांवरही हल्ला करण्याची शक्यता नाकारता येत नाही.

गव्यांची संख्या आता सर्वत्र वाढली आहे. जंगल सोडून गवे लोकवस्त्यांजवळ येण्यामागचे एक प्रमुख कारण म्हणजे घाट वा डोंगराळ परिसरात त्यांना खाद्य मिळणे दुरापास्त झाले आहे. खाद्याच्या शोधार्थ गव्यांनी आपला मोर्चा लोकवस्त्यांजवळ वळवला आहे. अलीकडच्या काळात बहुतेक ग्रामीण भागात गव्यांचे अस्तित्व जाणवत आहे.

-अमृत सिंग, प्राणीमित्र