Bison In Ponda: बोणबाग- बेतोडामध्ये भरवस्तीत गवा रेड्यांचा मोकाट वावर, परिसरात भीतीचं वातावरण Watch Video

फोंडा : बोणबाग- बेतोडा परिसरात गव्यांचा वावर दिवसेंदिवस वाढत असून स्थानिक नागरिकांमध्ये भीतीचे वातावरण निर्माण झाले आहे. सोमवारी (११ ऑगस्ट) पहाटे शांताराम गावडे यांच्या घराजवळ तब्बल सहा गवे दिसून आले. ही घटना पाहताच ग्रामस्थांमध्ये घबराट पसरली.

गेल्या वर्षी ऑक्टोबर महिन्यात याच परिसरात गव्याच्या हल्ल्यात मंगला शांताराम गावडे या महिलेला जीव गमवावा लागला होता. त्यामुळे अजूनही त्या घटनेची धास्ती लोकांच्या मनात ताजी असून, सोमवारी पुन्हा गव्यांचा वावर दिसल्याने भीती अधिकच वाढली आहे.

गवे शेतीचेही मोठे नुकसान करतात. भात, भाजीपाला, आणि फळबागांची हानी करून ते शेतकऱ्यांचे आर्थिक नुकसान करतात. याशिवाय, या भागात अनेकदा बिबट्यांचाही वावर दिसतो, ज्यामुळे जंगलातील वन्यजीवांचं लोकवस्तीत स्थलांतर वाढल्याचं पाहायला मिळत आहे.

वनविभागाकडून गव्यांचा वावर रोखण्यासाठी आणि नागरिकांच्या सुरक्षेसाठी अद्याप ठोस पावले उचलली गेली नसल्याने लोकांमध्ये असंतोष आहे. ग्रामस्थांनी लवकरात लवकर गवे हुसकावण्यासाठी आणि शेतीचे नुकसान टाळण्यासाठी उपाययोजना करण्याची मागणी केली आहे.