Agruculture News : डिचोली, ता. १० (प्रतिनिधी) : तालुक्यातील विविध भागात भातशेती चांगली बहरली असून शेती पिकण्याच्या वाटेवर आहे. चालू महिन्याच्या अखेरपर्यंत भातशेती कापणी आणि मळणीसाठी तयार होणार आहे.
कापणीच्या वेळी वरुणराजाने कृपादृष्टी केली तर यंदा भात पीक चांगले मिळणार, अशी आशा शेतकऱ्यांना आहे. कृषी खात्यालाही तसा विश्वास आहे.
डिचोली विभागीय कृषी कार्यालयाच्या कक्षेत साळ, धुमासे, मेणकूरे, मये, पिळगाव, बोर्डे, अडवलपाल आदी भागात मिळून यंदा जवळपास ६०० हेक्टर शेतजमीन भात लागवडीखाली आली आहे. यंदा भात लागवडीसाठी झालेला
उशीर तसेच जुलै महिन्याच्या अखेरीस पावसाने घातलेला धुमाकूळ यामुळे यंदा भातशेती धोक्यात येते की काय, अशी स्थिती निर्माण झाली होती. मात्र जुलै महिन्यातील संकटानंतर भात शेतीला पोषक वातावरण निर्माण झाले.
आता भातशेती कणसांनी चांगली बहरली आहे. अलीकडेच काही दिवस सतत पाऊस पडला तरी त्याचा भात शेतीवर विशेष परिणाम झालेला नाही, अशी माहिती शेतकऱ्यांसह कृषी खात्याच्या अधिकाऱ्यांकडून मिळाली आहे.
हवामान संतुलित राहिले आणि पावसाची कृपा झाली तर यंदा भाताचे उत्पन्न वाढणार. त्यामुळे शेतकऱ्यांच्या चेहऱ्यावर निश्चितच हास्य फुलणार आहे.
- दत्तप्रसाद जोग, विभागीय कृषी विस्तार अधिकारी
जुलै महिन्याच्या अखेरीस पावसाने धुमाकूळ घातला. तरव्याची नासाडी झाली. त्यामुळे यंदा बहरण्यापुर्वीच भातशेती धोक्यात येणार असल्याचे संकेत मिळाले होते. पाऊस ओसरताच काही शेतकऱ्यांनी तरव्याची नव्याने लागवड केली.
अजून तरी शेतकऱ्यांना कष्टाचे फळ मिळण्याची आशा आहे. भाताच्या कापणी आणि मळणीवेळी पावसाने कृपादृष्टी केली तर यंदा भाताचे उत्पन्न वाढणार अशी आशा आहे.
-विश्वास चोडणकर, शेतकरी, मये.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.