Laterite Stone Theft: मयेतील खाणीमध्ये जांभा दगडाच्या चोरीप्रकरणी 4 जणांना अटक; डिचोली पोलिसांची कारवाई

Laterite Stone Theft: मये इथल्या एका चिरेखाणीमध्ये जांभा दगडाची अवैधरित्या वाहतूक होत असल्याची माहिती डिचोली पोलिसांना मिळाली. काहीजण खाणीत चिरा दगडाची चोरी करून ते ट्रकमध्ये भरून नेत होते. याप्रकरणी डिचोली पोलिसांनी 4 जणांना ताब्यात घेतले आहे.

याप्रकरणात अजून एकाचा समावेश असून पाचव्या आरोपीला पोलीस अद्याप अटक करू शकले नाहीत. संदीप जोवारी लकारा, महाबीर लक्ष्मण राम, लालदेव लक्ष्मण राम हे आरोपी सध्या मयेमध्येच वास्तव्यास आहेत. तर ट्रक चालक मुकुंद वसंत केरकर आणि अमर तुयेकर अशी आरोपींची नावे आहेत.

दरम्यान, पोलिसांनी इलेक्ट्रिक मोटार, कटिंग मशीन ब्लेड, दोन जनरेटर आणि एक पॉवर टिलर बसवलेले कटिंग मशीन ताब्यात घेतले आहे. आरोपींना आयपीसी, खाण आणि खनिज (विकास आणि नियमन कायदा) 1957 च्या तरतुदीनुसार अटक करण्यात आली आहे. पुढील तपास पोलीस करत आहेत.