Bicholim Market : डिचोली बाजार संकुलात ‘गळती’ची समस्या कायम; व्यापाऱ्यांमध्ये चिंता

Bicholim Market :

डिचोली, बाजार संकुलाच्या छपराची दुरुस्ती केली असली, तरी या संकुलात ‘गळती’ची समस्या कायम आहे. अलीकडेच पडलेल्या अवकाळी पावसावेळी या संकुलातील काही भागात ‘गळती’ लागली होती.

त्यामुळे संकुलातील फळभाजी विक्रेत्यांसह दुकानदारांची चिंता वाढली आहे. यंदा तरी ‘गळती’पासून आम्हाला मुक्ती मिळेल काय? असा प्रश्न या विक्रेत्यांसह दुकानदारांना सध्या सतावत आहे.

गेल्या तीन पावसाळ्यांपासून डिचोलीतील तिसऱ्या टप्प्यातील बाजार संकुलात पावसाच्या ‘गळती’ची समस्या आहे. गेल्यावर्षी तर ही समस्या गंभीर बनली होती. नंतर पालिकेने छपराची डागडुजी केली.

त्यानंतर आता यंदाच्या पावसाळ्यात गळतीपासून मुक्ती मिळणार असे व्यापाऱ्यांना वाटत असतानाच, अवकाळी पावसाने गळतीची झलक दाखवून दिली आहे. आता पावसाळा जवळ आला आहे. त्यामुळे फळभाजी विक्रेत्यांसह अन्य व्यापाऱ्यांची चिंता वाढली आहे.

संकुलात जलधारा

गेल्या तीन पावसाळ्यांपासून डिचोलीतील बाजार संकुल इमारतीला गळतीचे ग्रहण लागले आहे. गेल्यावर्षी ही समस्या मोठी आणि गंभीर झाली होती. पावसावेळी संकुलाच्या छपरातून पाण्याची गळती लागते. जोरदार पाऊस पडला, की संकुलात सर्वत्र जलधारा सुरू होतात आणि मग फळ - भाजी आदी विक्रेत्यांसह दुकानदारांची धांदल उडते.