Bicholim: हाउसिंग बोर्ड, डिचोलीत आंब्याचे झाड कोसळण्याच्या मार्गावर! नागरिकांना धोका, पालिकेकडे झाड हटवण्याची मागणी

डिचोली: शहरातील हाउसिंग बोर्ड बालोद्यानाजवळील कमकुवत झालेले आंब्याचे झाड कोसळण्याच्या मार्गावर असून, परिसरातील नागरिकांना धोका निर्माण झाला आहे. रहदारीच्यावेळी हे झाड कोसळल्यास मोठा अनर्थ घडण्याची शक्यता नाकारता येत नाही. तशी भीतीही स्थानिक व्यक्त करीत आहेत.

वर्षभरापूर्वी या झाडाची एक मोठी फांदी कोसळली होती. मात्र, सुदैवाने त्यावेळी कोणताही अनर्थ घडला नव्हता. नेहमीच गजबजलेल्या या रस्त्यावर एखादी दुर्घटना घडण्यापूर्वीच हे धोकादायक झाड कापावे, अशी मागणी वाहनचालक आणि पादचाऱ्यांकडून करण्यात येत आहे.

बालोद्यानाला लागूनच जंक्शनवरील आंब्याचे झाड पूर्णपणे सुकले आहे. दिवसेंदिवस हे झाड अत्यंत कमकुवत होत असून, हे झाड कोणत्याही क्षणी कोसळेल, अशी भीती आहे. हे झाड आहे, तेथून लोक ये-जा करतात.

सायंकाळी या भागात मुलांचीही वर्दळ असते. त्याठिकाणी दुचाकी आणि चारचाकी वाहनेही पार्क करून ठेवतात. एखादा अनर्थ घडण्यापूर्वीच पालिकेने पुढाकार घेऊन हे झाड कापावे, अशी मागणी श्रीधर मयेकर आदी स्थानिकांनी केली आहे.