Cash For Job प्रकरणी एक ‘सोनार’ अडचणीत? सोन्याची बिस्कीटे ठेवली गहाण; पोलिसांनी घेतली जबानी

Priya Yadavs Cash For Job Scam Widens: Goldsmith Implicated in 4 Lakh Rupee Transaction

डिचोली: प्रिया यादव हिने डिचोलीतील चार बहिणींची फसवणूक केल्याप्रकरणी शहरातील एक ‘सोनार’ अडचणीत येण्याची शक्यता आहे. संबंधित सोनाराकडे प्रिया यादव हिने सोन्याचा एक किंमती दागिना गहाण ठेवून त्याच्याकडून ४ लाख रुपये घेतले आहेत, अशी माहिती समोर आली आहे.

दरम्यान, याप्रकरणी पोलिसांनी चौकशीचे काम सुरू केले आहे. फसवणूक झालेल्या चारही बहिणींसह संबंधित सोनाराला स्थानकात पोलिसांनी बोलावून त्यांची जबानी घेतली आहे, अशी माहिती मिळाली आहे. प्राप्त माहितीनुसार प्रिया यादवने भगिनींपैकी एकीकडून घेतलेली ११६ ग्रॅम सोन्याची बिस्कीटे सोनाराकडे गहाण ठेवली,अशी माहिती मिळाली.

सुमारे कोटीची फसवणूक

प्रिया यादव हिने बोर्डे-डिचोली येथील जयंती, ललिता, मिलन आणि पूर्णा वायंगणकर या चार बहिणींना रोख ७९.३३ लाख आणि सुवर्णालंकार मिळून एक कोटीच्या आसपास गंडा घातला आहे. २०१७ ते २०२४ या सात वर्षांच्या कालावधीत वेगवेगळी आमिषे दाखवून प्रिया हिने या बहिणींची फसवणूक केल्याचे समजते. याप्रकरणी जयंती वायंगणकर हिने डिचोली पोलिसांत तक्रार दिल्यानंतर पोलिसांनी प्रिया विरोधात फसवणुकीचा गुन्हा नोंद केला आहे. वरिष्ठ अधिकाऱ्यांच्या मार्गदर्शनाखाली याप्रकरणी पोलिस पुढील तपास करीत आहेत.