Goa Weather Update: लोकांनी सोडला सुटकेचा निःश्वास! नदीचे पाणी ओसरले

पावसाचा जोर काहीसा कमी झाल्‍यामुळे डिचोली शहरासह सखल भागातील जनतेने सुटकेचा निःश्वास सोडला आहे. नदीचे पाणी ओसरल्याने डिचोलीवरील पुराचे संकट तूर्त टळले आहे.

दरम्यान, या पावसाच्या तडाख्यात एक कोटीहून अधिक रुपयांच्या मालमत्तेचे नुकसान झाल्याचा प्राथमिक अंदाज आहे. पावसामुळे डिचोलीसह वाळवंटी आणि अस्नोड्यातील पार नदीच्या पाण्याची पातळी वाढली होती. या नद्यांच्‍या पाण्‍याने पातळी सोडली होती. पण सध्‍या स्‍थिती नियंत्रणात आहे.

मध्‍यरात्रीच घेतली आमदारांनी धाव

पावसामुळे डिचोलीत हाहाकार उडाला होता त्यावेळी डिचोलीचे आमदार डॉ. चंद्रकांत शेट्ये हे राज्याबाहेर होते. स्थितीची माहिती मिळताच त्यांनी डिचोलीकडे धाव घेतली. मध्यरात्रीच त्‍यांनी मामलेदार आणि सरकारी अधिकाऱ्यांसह डिचोलीतील पूरसदृश भागाची पाहणी केली. तसेच आढावा घेताना नुकसानीचा अहवाल तयार करण्याचे निर्देशही अधिकाऱ्यांना दिले.