Bicholim Bus Station : डिचोली बसस्थानकावरील खड्डे बुजविण्याचे काम सुरू; प्रवाशांमध्ये समाधान

डिचोली, बसस्थानकावरील खड्डे बुजविण्याचे काम अखेर आजपासून (सोमवारी) हाती घेण्यात आले आहे. खड्डे बुजविण्यात येत असल्याने बसचालकांसह प्रवाशांकडून समाधान व्यक्त करण्यात येत आहे.

शहरातील तात्पुरत्या बसस्थानकावर सध्या लहान-मोठे खड्डे पडल्यामुळे बसस्थानकाची दुर्दशा झाली आहे. प्रवासी बसगाड्या आत आणि बाहेर घेतात, त्या भागात लहानसहान खड्डे पडल्याने प्रवासी बसवाल्यांसाठी डोकेदुखी बनली होती.

बसगाड्या आत घेताना बसचालकांना कसरत करावी लागत असे. प्रवाशांना तर गचक्यांचा अनुभव येत होता. या खड्ड्यांमुळे बसगाड्यांच्या सुट्या भागांची मोडतोडही होत होती. तशी खंतही बसचालक व्यक्त करीत होते.

सध्या पावसाचे दिवस असल्यामुळे जोरदार पाऊस पडला, की खड्डे पाण्याने पाण्याने भरत होते. बसगाड्या आतबाहेर घेताना खड्ड्यांतील चिखलमय पाणी प्रवाशांवर उसळत असे. त्यामुळे प्रवाशांना नाहक मनस्ताप सहन करावा लागत असे.

आमदारांच्या निर्देशानंतर दुरुस्ती

आपत्कालीन व्यवस्थापनांतर्गत गेल्या शनिवारी आमदार डॉ. चंद्रकांत शेट्ये यांनी सरकारी अधिकाऱ्यांची आढावा बैठक घेतली होती. पावसाळ्यातील समस्या सोडवा, असे निर्देश आमदारांनी सरकारी अधिकाऱ्यांना दिले होते.

त्यांच्याच निर्देशानुसार ‘पीडब्ल्यूडी’च्या रस्ता विभागातर्फे दगड आणि माती घालून खड्डे बुजवल्यानंतर ‘जेटपॅचर’द्वारे डांबरीकरण करण्यात येणार आहे, अशी माहिती ‘पीडब्ल्यूडी’च्या अधिकाऱ्यांनी दिली.