Bicholim: दगड घालून खड्डे बुजवले, पावसाने होत्याचे न्हवते केले; डिचोलीतील अंतर्गत रस्त्यांची लागली ‘वाट’

डिचोली: डिचोली शहरातील अंतर्गत रस्त्यांची अवस्था दिवसेंदिवस बिकट होऊन वाट लागली असून, रस्त्यांवरील खड्डे रुंदावत असल्याचे दिसून येत आहे. गेल्या दोन महिन्यांपासून रस्त्यांची दुर्दशा झाली आहे. भर पावसात या रस्त्यांवरून वाट काढताना वाहनचालकांसह पादचाऱ्यांना मनस्ताप सहन करावा लागत आहे.

पावसाच्या कहरामुळे तर भर चतुर्थीत वाहनचालकांना वाहने हाकताना अक्षरशः कसरत करावी लागत आहे. कदंब बसस्थानकाकडून बाजारात जाणाऱ्या रस्त्यासह बोर्डे येथे मुख्य रस्ता, भायलीपेठ सोनारपेठ आदी शहरातील काही अंतर्गत रस्त्यांची वाताहात झाली आहे. या रस्त्यांवर लहान खड्डे पडले असून, पावसामुळे हे रस्ते रुंदावत आहेत.

पावसावेळी हे खड्डे पाण्याने भरत असून, त्यातून वाट काढताना वाहनचालकांना कसरत करावी लागते. बऱ्याचदा या खड्डयांचा अंदाज येत नसल्याने वाहनचालकांचा गोंधळ उडतो. खड्डयांमुळे गचके बसून वाहनांचे सुटे भाग मोडत असून, दुचाकी घसरून लहानसहान अपघातही होत आहेत.

अशी माहिती उपलब्ध झाली आहे. पावसावेळी खड्डे पाण्याने भरले की, वाहने जाताना खड्डयांतील पाणी रस्त्यावरुन जाणाऱ्या पादचाऱ्यांवर उसळण्याचे प्रकार वाढले. दरम्यान, दगड घालून रस्त्यांवरील खड्डे बुजवले होते. मात्र जोरदार पावसामुळे पुन्हा एकदा खड्डे निर्माण झाले आहे. नवीन जलवाहिनी टाकण्यासाठी शहरातील बहूतेक रस्ते फोडले होते.

जलवाहिनी टाकण्याचे काम पूर्ण झाल्यानंतर फोडलेले रस्ते जाग्यावर घालण्याचे काम सुरु करतानाच अवकाळी पावसाचा धुमाकूळ आणि नंतर मोसमी पावसाला सुरवात झाली यामुळे चर बुजवून रस्ते पूर्ववत करण्याचे कामात अडथळा येऊन हे गडबडीत करावे लागले. त्यामुळेच रस्त्यांची काहीशी वाईट स्थिती झाली आहे, असे बांधकाम खात्यातील एका अधिकाऱ्याने मान्य करून, शहरातील रस्त्यांची डागडुजी करण्यात येईल, असेही त्यांनी सांगितले.