Sanquelim Road Issue: देसाईनगर साखळीतील रस्ता बनला धोकादायक; तातडीने डागडुजीची करण्याची रहिवाशांची मागणी

डिचोली: गेल्या उन्हाळ्यात साखळी शहरात सर्वत्र पाण्याची मोठी जलवाहिनी घालण्यासाठी खोदलेले चर पूर्वपदावर आणून रस्त्याच्या समतोल न करण्यात आल्याने सर्वत्र रस्ते अत्यंत धोकादायक बनले आहेत. त्यात देसाईनगर येथे जाणारा चढण व उतरणीचा रस्ता तर अत्यंत धोकादायक स्थितीत असून रस्त्याची एक बाजू पूर्णपणे वाहून गेल्याने त्याचा धोका अधिकच वाढला आहे.

तीन दिवसांवर गणेशचतुर्थी असल्याने या रस्त्यावर मोठ्या प्रमाणात वाहनांची ये जा वाढणार आहे, अशावेळी या धोकादायक रस्त्यामुळे अपघात घडू नये, यासाठी वेळीच प्रशासनाने वा पालिकेने खबरदारी घ्यावी, अशी मागणी देसाईनगर भागातील लोकांनी केली आहे.

गोकुळवाडी येथून देसाईनगर जाणारा रस्ता हा आधीच अरुंद आहे. त्यातच या रस्त्याच्या एका बाजूला चर खोदून मोठी जलवाहिनी घालण्यात आली होती. या जलवाहिनचे काम झाल्यानंतर वास्तविक सदर चर पूर्णपणे बुजवून त्यावर दगड मांडून रोलर फिरवणे आवश्यक होते.

मात्र, तसे न होता सदर चर आहे तसेच सोडून कंत्राटदाराने उर्वरित कामाकडे दुर्लक्ष केले. त्यामुळे मे महिन्यापासूनच सुरू झालेल्या पावसाने या रस्त्यावरील चरांमधील माती व दगड वाहून गेल्याने ते चर अधिक खोल झाले.