Bicholim News : गोमंतकातील वारकऱ्यांना दिलासा; म्हैसाळ येथे निवासाची व्यवस्था

Bicholim News :

डिचोली, आषाढी एकादशीनिमित्त पायी वारी करत पंढरपूरला जाणाऱ्या गोव्यातील वारकरी भक्तांसाठी आता एक खूषखबर आहे.

ती म्हणजे वारकऱ्यांच्या सेवेसाठी महाराष्ट्रातील म्हैसाळ येथे सभागृह अर्थातच भक्तनिवासाची सोय करण्‍यात आली आहे. या भक्तनिवासामध्ये स्वच्छतागृह आदी सर्व सुविधा उपलब्ध करण्यात आल्‍या आहेत. त्यामुळे म्हैसाळ येथे एक दिवस विश्रांती घेणाऱ्या वारकऱ्यांची यंदापासून चांगली सोय होणार आहे.

म्हैसाळ येथील श्री रेणुकादेवी भक्त मंडळ पंच समितीच्या सहकार्याने म्हैसाळ येथील एक समाजसेवक कैलासराव शिंदे यांनी हे सुसज्ज भक्तनिवास उपलब्‍ध करून दिले आहे. आषाढी एकादशीला दरवर्षी पंढरपूरच्या चंद्रभागा तिरी विठ्ठलभक्तांचा मेळा भरत असतो.

या मेळ्यात सहभागी होऊन पंढरीच्या विठुरायाचे दर्शन घेण्यासाठी गोमंतकातील डिचोलीसह अन्य भागातून मिळून शेकडो विठ्ठलभक्त वारकरी दरवर्षी पायी वारी करीत पंढरपूरला जातात. हे वारकरी दुपारी आणि रात्रीच्या वेळी ठराविक ठिकाणी विश्रांती घेतात. वारकऱ्यांचे सर्वत्र स्वागत करुन त्यांची सेवा करण्यात येते. म्हैसाळ येथेही वारकऱ्यांची जेवणाखाण्यासह रात्रीच्या विश्रांतीची व्यवस्था करण्यात येते. आता सर्व सोयींयुक्त अशा सभागृहाची व्‍यवस्‍था करण्‍यात आली आहे. त्‍यामुळे म्हैसाळ येथे विश्रांती घेणाऱ्या वारकऱ्यांची चांगली

सोय होणार आहे.

गोमंतकातून विठ्ठलभक्त वारकरी पायीवारी करीत पंढरपूरला जाताना म्हैसाळ येथे विश्रांती घेतात. अलीकडच्या काही वर्षांपासून वारकरी मंडळ आणि वारकऱ्यांचा आकडा वाढलेला आहे. पूर्वीपासून माझे वडील स्व. डॉ. जयसिंगराव शिंदे वारकऱ्यांची सेवा करत होते.

वारकऱ्यांची सेवा केल्याने पुण्य मिळते, असे ते सांगायचे. वडिलांचा सल्ला मानून वारकऱ्यांना चांगली सेवा मिळावी यासाठी त्यांच्या निवाऱ्याची व्यवस्था म्हणून सभागृह अर्थातच भक्तनिवासाची व्‍यवस्‍था उपलब्‍ध करून दिली आहे. वारकऱ्यांची सेवा ही एका अर्थी श्री विठ्ठलाचीच भक्ती आहे.

- कैलासराव शिंदे, समाजसेवक (म्हैसाळ)