LPG Theft: सावधान...गॅस सिलेंडरची 'अशी' होतेय चोरी, कळंगुटमधील घटनेने खळबळ

LPG Theft तुमच्या घरी येणाऱ्या गॅस सिलिंडरमधून गॅसची कशी चोरी होतेय असं जर कुणी तुम्हाला सांगितलं तर कदाचित तुम्ही त्यावर विश्वास ठेवणार नाही. पण या संबंधीची घटना नुकतीच कळंगुट येथे घडलीय. कळंगुट मधील स्थानिकांच्या सतर्कतेने एक मोठी घटना उघडकीस आली आहे.

कळंगुट येथे गॅस सिलिंडर पुरवठा करणारा टेम्पो उभा होता. या ट्रकमधून अचानक मोठा स्फोट सदृश्य आवाज आल्याने तेथील स्थानिकांनी टेम्पोजवळ धाव घेतली. त्या टेम्पोमध्ये दोघे जण पाइपमधून एका सिलिंडरातील गॅस दुसऱ्या सिलिंडरमध्ये ट्रान्सफर करत असल्याचे त्यांच्या निदर्शनास आले.

आपले कृत्य स्थानिकांना समजल्याने त्यांच्या लक्षात येताच त्यांनी सिलिंडरने भरलेली गाडी घटनास्थळी टाकून पळ काढला. खरं तर गॅसचोरी करणाऱ्यांचं हे कृत्य जीवघेणं देखील ठरू शकलं असतं.

कारण गॅसचोरी करताना तिथं स्फोट होण्याची देखील भीती होती. पण स्थानिकांच्या सतर्कतेमुळे मोठी दुर्घटना टळली. दरम्यान या घटनेची खबर पोलिसांना देण्यात आल्यावर पोलीस घटनास्थळी दाखल झाले. त्यांनी सदर टेम्पो पोलीस स्टेशनमध्ये नेत चौकशीसाठी ताब्यात घेतला आहे.