Cleaning Campaign : होंडा येथे कचरा निर्मूलनासंदर्भात जनजागृती

Cleaning Campaign : पर्ये मतदारसंघात येणाऱ्या होंडा पंचायतीच्यावतीने पंचायत संचालनालय यांच्या मार्गदर्शनाखाली आणि स्वच्छ भारत अभियान ग्रामीण दोन या योजनेंतर्गत बुधवारी (ता. २२) कचरा निर्मूलन मोहिमेला सुरुवात करण्यात आली, यावेळी कचरा व्यवस्थापन व निर्मूलन संस्थेच्यावतीने रोड शो करून नागरिकांना कचरा व्यवस्थापन करण्यासंदर्भात जनजागृती करण्यात आली.

यावेळी उपसरपंच रेशम गावकर, पंच स्मिता मोटे, सुशांत राणे, दीपक गावकर, कृष्णा गावकर, सिया बोडके पंचायत सचिव मुला वरक, तसेच स्वच्छ भारत अभियान ग्रामीण भाग दोन या संस्थेच्या संयोजक साक्षी टिकार, सुजित नाईक, भगवान महावीर सरकारी माध्यमिक विद्यालयाच्या शिक्षिका स्वाती पडते, सुलोचना बाराजणकर आदी उपस्थित होते.

ज्या नागरिकांनी उघड्यावर कचरा टाकला त्यांना पंचायत सचिव मुला वरक यांनी दंड ठोठावण्याचा आदेश पंचायत कारकूनला देण्यात आला.

कर्मचाऱ्यांना टी शर्ट व टोप्या

जनजागृती कार्यक्रमात भगवान महावीर सरकारी माध्यमिक विद्यालयातील विद्यार्थी सहभागी झाले होते. यावेळी कचरा निर्मूलन संस्थेच्या वतीने पंचायत क्षेत्रात कचरा गोळा करणाऱ्या कर्मचाऱ्यांना टी शर्ट व टोप्यांचे वाटप केले. या मोहिमेची सुरुवात सरपंच शिवदास माडकर यांनी हिरवा झेंडा दाखवून केली

‘रोड शो’द्वारे जनजागृती

होंडा बसस्थानक तसेच नवीन पंचायत इमारतीच्या परिसरात उघड्यावर टाकण्यात आलेला कचरा गोळा करण्यात आला. या परिसरात मोठ्या प्रमाणात नागरिकांनी कचरा उघड्यावर टाकलेला दिसून आला. या कार्यक्रमानंतर होंडा वाडाकडे तसेच होंडा तिस्क येथे रोड शो करून नागरिकांना कचरा व्यवस्थापन करण्यासंदर्भात जनजागृती करण्यात आली.