Benaulim Attack Case: बाणावलीत युवकावर हल्ला प्रकरणात फरार असलेले 3 संशयित अखेर आले शरण

Benaulim Attack Case: बाणावली येथे पार्किंगच्या कारणावरून झालेल्या वादातून अलॉयसीस बार्रेटो या तरूणाला काही जणांनी मारहाण केली होती. या प्रकरणात एका संशयिताला पोलिसांनी अटक केली होती. तर आणखी तिघे जण फरार झाले होते.

त्यानंतर आज, मंगळवारी या हल्ल्यात सहभागी असलेले तिघेही संशयित पोलिसांत शरण आले आहेत.

आकाश आटवेकर (रा. बोर्डा, मडगाव), सिद्धेश नाईक (रा. राया, सासष्टी), केशवर रामगिरी (रा. चांदोर) अशी त्यांची नावे आहेत. कोलवा पोलिसांनी त्यांना ताब्यात घेतले असून या सर्वांकडे चौकशी केली जात आहे.

अलॉयसीस बार्रेटो याच्यावर सॅम्युअल मास्कारेन्हस याने लोखंडी सळीने हल्ला झाला होता. त्यात बार्रेटो गंभीर जखमी झालेला असून त्याच्यावर रूग्णालयात उपचार सुरू आहेत.

पोलिस निरीक्षक थेरन डिसोझा हे या प्रकरणाचा तपास करत आहेत. सॅम्युअल हा दहा दिवसांच्या सुटीवर लंडनमधून गोव्यात आला होता. रविवारी तो परत जाणार असल्याने त्याने मित्रांसोबत पार्टी केली होती.

रात्री 2 वाजता हॉटेलबाहेर सॅम्युअल आणि त्याच्या मित्रांचा दुसऱ्या एका गटाशी वाद झाला व त्याचे रुपांतर हाणामारीत झाले. या वेळी सॅम्युअलच्या गटातील एकाने विरुद्ध गटातील एकावर रॉडने वार केला.

या प्रकरणातील एक हल्लेखोर रविवारी दुपारी विमानाने लंडनला जाणार असल्याची माहिती मिळाली. संशयित सॅम्युअल मोपा विमानतळावर विमानात बसला असतानाच कोलवा पोलिसांनी त्याला तिथूनच ताब्यात घेतले होते.