Goa Belgaum Road: चोर्लाघाट-बेळगाव रस्त्याबाबत मोठी अपडेट; या मार्गावरुन प्रवास करण्यापूर्वी बातमी वाचा

Chorla Ghat to Belgaum Road

खांडोळा: जांबोटी-बेळगाव महामार्ग रविवारी (ता.२५) आज दुपारपासून वाहतुकीसाठी बंद करण्यात आला. त्यामुळे चोर्ला घाटमार्गे बेळगावला जाणाऱ्यांना जांबोटीपर्यंतच प्रवास करता येतो. पुढील रस्ता बंद असल्यामुळे खानापूरमार्गे बेळगावला जावे लागते. त्यामुळे गोमंतकीय प्रवाशांना थोडे अधिक अंतर कापावे लागत आहे.

कुसमुळी येथे नवीन पुलाचे बांधकाम सुरू आहे. त्यासाठी पर्यायी रस्ता केला आहे; मात्र पावसाचा जोर वाढल्यामुळे देवाचीहट्टी आणि तोराळी बंधाऱ्याच्या फळ्या काढल्या आहेत. अचानक पाणी वाढल्याने पाणी कुसमुळी पुलावर आले. त्यामुळे खबरदारीचा उपाय म्हणून जांबोटी-बेळगाव महामार्गावरील वाहतूक बंद करून जांबोटी-खानापूरमार्गे वळविण्यात आली.

कुसमुळी येथे नवीन पुलाच्या पहिल्या तीन कमानींचा स्लॅब झाला आहे. उर्वरित तीनसाठी महिन्याभरात स्लॅब घालण्यात येणार आहे. या ठिकाणी पर्यायी रस्ता केला आहे. मात्र, गेल्या आठवड्यापासून पडत असलेल्या पावसामुळे साहजिकच पश्चिम भागात पाण्याचे प्रमाण वाढले आहे.

त्यामुळे तोरोळी आणि देवाचीहट्टी येथे बंधाऱ्याला पाणी आल्यामुळे फळ्या काढल्या आहेत. दुसरीकडे पर्यायी रस्ता असणाऱ्या जागी पाण्याचा योग्य निचरा होत नसल्याने धोका उद्‍भवण्याची शक्यता असल्याने जांबोटी-बेळगाव रस्ता बंद करण्यात आला आहे. हब्बनहट्टी- बैलूर-बेळगाव असा पर्यायी मार्ग उपलब्ध करून देण्यात आला.

गोवेकरांची तारांबळ!

शनिवारी गेलेल्या गोवेकरांना रविवारी गोव्यात येणे कठीण झाले. काहींनी खानापूर-अनमोडमार्गे गोवा गाठला तर काहींना खानापूर-जांबोटी- चोर्ला मार्गाने गोव्यात यावे लागले. रविवारी हा रस्ता बंद केल्यामुळे गोवेकरांची तारांबळ उडाली. गेल्या चार दिवसातील पावसामुळे मलप्रभा नदीत पाणी वाढल्याने नदीतून तयार केलेल्या पर्यायी रस्त्यावरून वाहतूक सुरू होती. हा रस्ता धोकादायक बनल्याने वाहतूक बंद करण्यात आली.